ابھی کچھ دن لگیں گے

ابھی کچھ دن لگیں گے

دل ایسے شہر کے پامال ہو جانے کا منظر بھولنے میں

ابھی کچھ دن لگیں گے

تھکے ہارے ہوئے خوابوں کے ساحل پر کہیں امید کا چھوٹا سا اک گھر

بنتے بنتے رہ گیا ہے

وہ اک گھر بھولنے میں ابھی کچھ دن لگیں گے

مگر اب دن بھی کتنے رہ گئے ہیں

بس اک دن دل کی لوح منتظر پر

اچانک

رات اترے گی

مری بے نور آنکھوں کے خزانے میں چھپے ہر خواب کی تکمیل کر دے گی

مجھے بھی خواب میں تبدیل کر دے گی

اک ایسا خواب جس کا دیکھنا ممکن نہیں تھا

اک ایسا خواب جس کے دامن صد چاک میں کوئی مبارک کوئی روشن دن نہیں تھا

ابھی کچھ دن لگیں گے

abhi kuchh din lagenge

dil aise shahr ke pamal ho jane ka manzar bhulne mein

abhi kuchh din lagenge

thake hare hue khwabon ke sahil par kahin ummid ka chhota sa ik ghar

bante bante rah gaya hai

wo ik ghar bhulne mein abhi kuchh din lagenge

magar ab din bhi kitne rah gae hain

bas ik din dil ki lauh muntazir par

achanak

rat utregi

miri be nur ankhon ke khazane mein chhupe har khwab ki takmil kar degi

mujhe bhi khwab mein tabdil kar degi

ik aisa khwab jis ka dekhna mumkin nahin tha

ik aisa khwab jis ke daman-e-sad chak mein koi mubarak koi raushan din nahin tha

abhi kuchh din lagenge