مری آنکھیں

مری آنکھیں

اٹی ہیں گرد سے پھر بھی

میں سب کچھ دیکھ سکتی ہوں

زمیں پر

گاؤں نے

جب روپ دھارا

شہر کا

تب سے

سحر کی آنکھ کھلتے ہی

اسے پھر نیند آنے تک

ہزاروں نقش پا بنتے بگڑتے ہیں

کئی مانوس ہیں ان میں

کئی ہیں اجنبی لیکن

سبھی یہ چاہتے ہیں

یاد رہ جائیں زمانے کو

سحر کی آنکھ کھلتے ہی

اسے پھر نیند آنے تک

نہ جانے کتنے رکشے سائکلیں موٹر

مجھے یوں روند کر

آگے بڑھتے ہیں

کہ جیسے میں نے اپنا جسم

ان کو بیچ ڈالا ہے

میں راہوں کا

مقدر ہوں

ستم دیکھو

مرے سینے پہ پھوڑے پھنسیاں اب بھی

گڑھوں کی شکل میں

پھیلی ہوئی ہیں

miri ankhen

ati hain gard se phir bhi

main sab kuchh dekh sakti hun

zamin par

gaon ne

jab rup dhara

shahr ka

tab se

sahar ki ankh khulte hi

use phir nind ane tak

hazaron naqsh-e-pa bante bigarte hain

kai manus hain un mein

kai hain ajnabi lekin

sabhi ye chahte hain

yad rah jaen zamane ko

sahar ki ankh khulte hi

use phir nind ane tak

na jane kitne rikshe saikilen motar

mujhe yun raund kar

age barhte hain

ke jaise main ne apna jism

un ko bech dala hai

main rahon ka

muqaddar hun

sitam dekho

mire sine pe phore phunsiyan ab bhi

garhon ki shakl mein

phaili hui hain