وہ کون تھے

وہ کون تھے

سحاب تھے کتاب تھے

مرے ہر اک سوال کا

جواب تھے

کہ خواب تھے

وہ کون تھے

ستارے تھے

کہ آسماں سے روشنی لئے ہوئے

زمیں پہ آ گئے تھے

میرے واسطے

وہ کون تھے

وہ ہم قلم وہ ہم زباں

وہ ہم یقیں وہ ہم گماں

وہ ہم خیال و ہم بیاں

وہ یوں ملے

کہ جیسے حافظے سے یاد

جیسے تشنہ مٹیوں سے بارشیں

کہ جیسے شام کو پرند

گھونسلوں سے جا ملیں

کہ جیسے ریگ زار کو

اماں ملے حیات کی

کہ جیسے میری ذات کو

اذاں ملی ہو ذات کی

وہ یوں ملے

تو اے زمین و آسماں کے نور

میرے مدعا

میں خواب دیکھتا ہوں

ڈھونڈھتا بھی ہوں بشارتیں

انہیں بھی

خواب دیکھنے

نظر ملے

یقین تراشنے گماں سے بھاگنے

ہنر ملے سفر ملے

وہ ظلم ہو کہ خوف ہو

وہ زخم ہو کہ چوٹ ہو

عذاب یا عتاب ہو

انہیں بچائے رکھ

تو اے مرے خدا

میں جب ملوں تو یوں ملوں

وہ جب ملیں تو یوں ملیں

کہ جیسے صبح شام سے

کوئی خود اپنے نام سے

کہ جیسے دھوپ چھاؤں سے

غریب شہر گاؤں سے

کہ جیسے لب دعاؤں سے

وہ یوں ملیں

میں یوں ملوں

مرے خدا

ہے یہ دعا

یہی دعا

wo kaun the

sahab the kitab the

mire har ik sawal ka

jawab the

ke khwab the

wo kaun the

sitare the

ke asman se raushni liye hue

zamin pe a gae the

mere waste

wo kaun the

wo ham qalam wo ham zaban

wo ham yaqin wo ham guman

wo ham khayal-o-ham bayan

wo yun mile

ke jaise hafize se yad

jaise tishna mittiyon se barishen

ke jaise sham ko parind

ghonslon se ja milen

ke jaise reg zar ko

aman mile hayat ki

ke jaise meri zat ko

azan mili ho zat ki

wo yun mile

tu ai zamin-o-asman ke nur

mere muddaa

main khwab dekhta hun

dhundhta bhi hun basharaten

unhen bhi

khwab dekhne

nazar mile

yaqin tarashne guman se bhagne

hunar mile safar mile

wo zulm ho ke khauf ho

wo zakhm ho ke chot ho

azab ya itab ho

unhen bachae rakh

tu ai mire khuda

main jab milun to yun milun

wo jab milen to yun milen

ke jaise subh sham se

koi khud apne nam se

ke jaise dhup chhaon se

gharib-e-shahr gaon se

ke jaise lab duaon se

wo yun milen

main yun milun

mire khuda

hai ye dua

yahi dua