یوں تو کہنے کو مرے خون کے پیاسے ہیں سبھی

یوں تو کہنے کو مرے خون کے پیاسے ہیں سبھی

سر قلم کون کرے گا کہ نہتے ہیں سبھی

کل جو مسجد میں گئے ہم تو یہ محسوس ہوا

ایک ہم ہی ہیں گنہ گار فرشتے ہیں سبھی

اب یہ کیوں میری زباں کاٹ رہے ہو صاحب

تم تو کہتے تھے کہ اس شہر میں گونگے ہیں سبھی

قد بڑھا دے مرا یا شاخوں کو نیچا کر دے

جس قدر پھل ہیں مرے ہاتھ سے اونچے ہیں سبھی

خود کو اب بیچنے نکلو گے تو جاؤ گے کہاں

جتنے بازار میں سکے ہیں وہ کھوٹے ہیں سبھی