اف وہ راوی کا کنارہ وہ گھٹا چھائی ہوئی

اف وہ راوی کا کنارہ وہ گھٹا چھائی ہوئی

شام کے دامن میں سبزے پر بہار آئی ہوئی

وہ شفق کے بادلوں میں نیلگوں سرخی کا رنگ

اور راوی کی طلائی نقرئی لہروں میں جنگ

شہ درے میں آم کے پیڑوں پہ کوئل کی پکار

ڈالیوں پر سبز پتوں سرخ پھولوں کا نکھار

وہ گلابی عکس میں ڈوبی ہوئی چشم حباب

اور نشے میں مست وہ سرمست موجوں کے رباب

وہ ہوا کے سرد جھونکے شوخیاں کرتے ہوئے

بن پیئے با مست کر دینے کا دم بھرتے ہوئے

دور سے ظالم پپیہے کی صدا آتی ہوئی

پے بہ پے کم بخت پی پی کہہ کر اکساتی ہوئی

اور وہ میں ٹھنڈی ٹھنڈی ریت پر بیٹھا ہوا

دونوں ہاتھوں سے کلیجہ تھام کر بیٹھا ہوا

شیخ صاحب! سچ تو یہ ہے ان دنوں پیتا تھا میں

ان دنوں پیتا تھا یعنی جن دنوں جیتا تھا میں

اب وہ عالم ہی کہاں ہے مے پئے مدت ہوئی

اب میں توبہ کیا کروں توبہ کئے مدت ہوئی

uf wo rawi ka kinara wo ghata chhai hui

sham ke daman mein sabze pur bahar ai hui

wo shafaq ke badalon mein nilgun surkhi ka rang

aur rawi ki tilai nuqrai lahron mein jang

shah darre mein am ke peron pe koyal ki pukar

daliyon par sabz patton surkh phulon ka nikhar

wo gulabi aks mein dubi hui chashm-e-habab

aur nashe mein mast wo sarmast maujon ke rabab

wo hawa ke sard jhonke shokhiyan karte hue

ban pie ba mast kar dene ka dam bharte hue

dur se zalim papihe ki sada ati hui

pe ba pe kam bakht pi pi kah kar uksati hui

aur wo main thandi thandi ret par baitha hua

donon hathon se kaleja tham kar baitha hua

shaikh sahab! sach to ye hai in dinon pita tha main

in dinon pita tha yaani jin dinon jita tha main

ab wo alam hi kahan hai mai piye muddat hui

ab main tauba kya karun tauba kiye muddat hui