سیاہی بن کے چھایا شہر پر شیطان کا فتنہ

سیاہی بن کے چھایا شہر پر شیطان کا فتنہ

گناہوں سے لپٹ کر سو گیا انسان کا فتنہ

پناہیں حسن نے پائیں سیہ کاری کے دامن میں

وفاداری ہوئی روپوش ناداری کے دامن میں

میسر ہیں زری کے شامیانے خوش نصیبی کو

اوڑھا دی سایۂ دیوار نے چادر غریبی کو

مشقت کو سکھا کر خوبیاں خدمت گزاری کی

ہوئیں بے خوف بے ایمانیاں سرمایہ داری کی

لیا آغوش میں پھولوں کی سیجوں نے امیری کو

مہیا خاک ہی نے کر دیئے آسن فقیری کو

تڑپنا چھوڑ کر چپ ہو گئے جی ہارنے والے

مزے کی نیند سوئے تازیانے مارنے والے

وہ روحانی وہ جسمانی عقوبت کم ہوئی آخر

غلامی بیڑیوں کے بوجھ سے بے دم ہوئی آخر

ہوئے فریادیوں پر بند ایوانوں کے دروازے

کہ خود محتاج درباں ہیں جہاں بانوں کے دروازے

اسی انداز سے جا سوئی غفلت بادشاہوں کی

سرور و کیف بن کر چھا گئیں نیندیں گناہوں کی

شرابیں ختم کر کے ہو گئے خاموش ہنگامے

بالآخر نیند آئی سو گئے پرجوش ہنگامے

تھما جب زندگی کا جوش پرخاش اجل جاگی

عمل کو دیکھ کر مدہوش پاداش عمل جاگی

اٹھایا موت نے پتھر جہنم کے دہانے سے

جہاں آتش کا دریا کھولتا تھا اک زمانے سے

بلندی سے تباہی کے سمندر نے کیا دھاوا

چٹانوں کے جگر سے پھوٹ نکلا آتشیں لاوا

دکھا دی آگ ایوانوں کو مظلومی کی آہوں نے

اٹھائے شعلہ ہائے آتشیں بیکس نگاہوں نے

انہیں مختار بن کر بیکسی کے خون کی موجیں

حصار مرگ نے محصور کر لیں جنگ جو فوجیں

نہ حسن و عشق نے پائی اماں قہر الٰہی سے

دبی پاداش امیری سے فقیری سے نہ شاہی سے

ستاروں کی نگاہوں نے دھواں اٹھتا ہوا دیکھا

مگر خورشید نے کچھ بھی نہ مٹی کے سوا دیکھا

siyahi ban ke chhaya shahr par shaitan ka fitna

gunahon se lipat kar so gaya insan ka fitna

panahain husn ne paen siyah kari ke daman mein

wafadari hui ruposh nadari ke daman mein

muyassar hain zari ke shamyane khush nasibi ko

orha di saya-e-diwar ne chadar gharibi ko

mashaqqat ko sikha kar khubiyan khidmat guzari ki

huin be khauf be imaniyan sarmaya dari ki

liya aghosh mein phulon ki sejon ne amiri ko

mahiya khak hi ne kar diye asan faqiri ko

tarapna chhor kar chup ho gae ji harne wale

maze ki nind su-e-taziyane marne wale

wo ruhani wo jismani uqubat kam hui akhir

ghulami beriyon ke bojh se be dam hui akhir

hue faryadiyon par band aiwanon ke darwaze

ke khud mohtaj-e-darban hain jahan banon ke darwaze

isi andaz se ja soi ghaflat badshahon ki

surur-o-kaif ban kar chha gain ninden gunahon ki

sharaben khatm kar ke ho gae khamosh hangame

bilakhir nind ai so gae purjosh hangame

thama jab zindagi ka josh-e-parkhash-e-ajal jagi

amal ko dekh kar madhosh padash-e-amal jagi

uthaya maut ne patthar jahannam ke dahane se

jahan atish ka dariya kholta tha ik zamane se

bulandi se tabahi ke samundar ne kiya dhawa

chatanon ke jigar se phut nikla atishin lawa

dikha di ag aiwanon ko mazlumi ki ahon ne

uthae shola ha-e-atishin bekas nigahon ne

unhen mukhtar ban kar bekasi ke khun ki maujen

hisar-e-marg ne mahsur kar len jang jo faujen

na husn-o-ishq ne pai aman qahr-e-ilahi se

dabi padash-e-amiri se faqiri se na shahi se

sitaron ki nigahon ne dhuan uthta hua dekha

magar khurshid ne kuchh bhi na mitti ke siwa dekha