گرم جوشی
Hafeez Jalandhari (1900–1982)گرم جوشی
اب سورج سر پر آ دھمکے گا
ٹھنڈا لوہا چمکے گا
اور دھوپ جواں ہو جائے گی
سٹھیائے ہوئے فرزانوں پر
اب زیست گراں ہو جائے گی
ہر اصل عیاں ہو جائے گی
اب خوب ہنسے گا دیوانہ
اب آگ بگولے ناچیں گے
سب لنگڑے لولے ناچیں گے
گرداب بلا بن جائیں گے
روندی ہوئی مٹی کے ذرے
طوفان بہ پا بن جائیں گے
صحرا دریا بن جائیں گے
اب خوب ہنسے گا دیوانہ
اب سستی جال بچھائے گی
اب دھونس نہ چلنے پائے گی
مزدوروں اور کسانوں پر
اب سوکھا خون نچوڑنے والے
روئیں گے نقصانوں پر
ان کھیتوں ان کھلیانوں پر
اب خوب ہنسے گا دیوانہ
اب پیلی دھات کی بیماری
پھیلا نہ سکیں گے بیوپاری
لوہے کا لوہا مانیں گے
سونے کی گہری کانوں میں
سو جانا بہتر جانیں گے
در در کی خاک نہ چھانیں گے
اب خوب ہنسے گا دیوانہ
اب خون کے ساگر کھولیں گے
انسان کے جوہر کھولیں گے
چڑھ جائے گی تپ صحراؤں کو
اٹھے گی امڈ کر لال آندھی
پی جائے گی دریاؤں کو
باندھے گا تند ہواؤں کو
اب خوب ہنسے گا دیوانہ
ہر زلف سے بچھو لپکیں گے
آنکھوں سے شرارے ٹپکیں گے
صیادوں حسن شکاروں پر
غصے کا پسینہ پھوٹے گا
موتی بن کر رخساروں پر
اس دھوپ میں چاند ستاروں پر
اب خوب ہنسے گا دیوانہ
اب دودھ نہ دیں گی بھینسیں گائیں
اف اف کرنے لگیں گی مائیں
بچے مم مم چیخیں گے
اور اونگھنے والے نکھٹو شوہر
''عقل مجسم'' چیخیں گے
سب درہم برہم چیخیں گے
اب خوب ہنسے گا دیوانہ
اب خانقہوں کی مردہ اداسی
روز ازل کی بھوکی پیاسی
جھومے گی مے خانوں پر
اب ساقی مغچے پیر مغاں
بیچیں گے وعظ دکانوں پر
ان زہر بھرے پیمانوں پر
اب خوب ہنسے گا دیوانہ
زورآوری سے کمزوروں کی
اب جیب کٹے گی چوروں کی
اور منڈی ساہو کاروں کی
اب بھوکی ''ہو حق'' سیر کرے گی
منڈیوں اور بازاروں کی
گت دیکھ کے دنیا داروں کی
اب خوب ہنسے گا دیوانہ
جینا دل گردہ ڈھونڈے گا
ہر زندہ ''مردہ'' ڈھونڈے گا
کوئی کونا کھدرا تہہ خانہ
اب ہر جنگل میں منگل ہوگا
ہر بستی میں ویرانہ
اک نعرہ لگا کر مستانہ
اب خوب ہنسے گا دیوانہ
سرد مہری
اب جاڑا جھنڈے گاڑے گا
اور فیل فلک چنگھاڑے گا
اب بادل شور مچائیں گے
اب بھوت فلک پر چڑھ دوڑیں گے
دھرتی کو دہلائیں گے
ہنسنے کے مزے اب آئیں گے
اب خوب ہنسے گا دیوانہ
ایوان کریں گے بھائیں بھائیں
پھونس کی جھونپڑیوں میں ہوائیں
سائیں سائیں گونجیں گی
اس گونج میں بھوکے ننگوں کی
سنسان صدائیں گونجیں گی
ویران سرائیں گونجیں گی
اب خوب ہنسے گا دیوانہ
اب بجلی کے کوڑوں سے ہوا
شمشیر بکف زنجیر بہ پا
لوہے کے رتھوں کو ہانکے گی
ایک ایک دھوئیں کے محمل سے
صد حسن کی ملکہ جھانکے گی
اب آگ انگارے پھانکے گی
اب خوب ہنسے گا دیوانہ
اب ٹھنڈی آہوں کے پرنالے
پالے آفت کے پر کالے
کندے تولے برسیں گے
اب آہن ٹھنڈا پڑ جائے گا
آہن کے گولے برسیں گے
ہر سر پر اولے برسیں گے
اب خوب ہنسے گا دیوانہ
تخریب کی توپیں چھوٹیں گی
تعمیر کی کلیاں پھوٹیں گی
ہر گورستان شاہی میں
بالائے ہوا زیر دریا
غل ہوگا مرغ و ماہی میں
اس نو آباد تباہی میں
اب خوب ہنسے گا دیوانہ
اب ناگن بانبی گرمائے گی
سانپ کی لالی لہرائے گی
کالے آتش دانوں میں
دانائیاں کینچلی بدلیں گی
شہروں کے بندی خانوں میں
اور دور کھلے میدانوں میں
اب خوب ہنسے گا دیوانہ
بھس خالی پیٹ میں بھر نہ سکے گا
کوئی تجارت کر نہ سکے گا
سکڑی سکڑی کھالوں کی
اب منڈھ بھی جائے تو بج نہ سکے گی
نوبت پیسے والوں کی
بیکاری پر دلالوں کی
اب خوب ہنسے گا دیوانہ
اب دال نہ جاگیروں کی گلے گی
آگ مگر دن رات جلے گی
چمڑے کے تنوروں میں
اب کال پڑے گا غلے کا
بیوپاریوں بے مقدوروں میں
اور پیٹ بھرے مزدوروں میں
اب خوب ہنسے گا دیوانہ
اب گاڑھا پسینہ بننے والے
اوڑھے پھریں گے شال دو شالے
مفت نہ جھولیں جھولیں گی
پھولے ہوئے گال اب پچکیں گے
پچکی ہوئی توندیں پھولیں گی
سب عقلیں چوکڑی بھولیں گی
اب خوب ہنسے گا دیوانہ
garm joshi
ab suraj sar par a dhamke ga
thanda loha chamkega
aur dhup jawan ho jaegi
sathyae hue farzanon par
ab zist giran ho jaegi
har asl ayan ho jaegi
ab khub hansega diwana
ab ag bagule nachenge
sab langre lole nachenge
girdab-e-bala ban jaenge
raundi hui mitti ke zarre
tufan ba pa ban jaenge
sahra dariya ban jaenge
ab khub hansega diwana
ab sasti jal bichhaegi
ab dhauns na chalne paegi
mazduron aur kisanon par
ab sukha khun nichorne wale
roenge nuqsanon par
in kheton in khalyanon par
ab khub hansega diwana
ab pili dhat ki bimari
phaila na sakenge byopari
lohe ka loha manenge
sone ki gahri kanon mein
so jana behtar janenge
dar dar ki khak na chhanenge
ab khub hansega diwana
ab khun ke sagar kholenge
insan ke jauhar kholenge
charh jaegi tap sahraon ko
uthegi umad kar lal andhi
pi jaegi dariyaon ko
bandhega tund hawaon ko
ab khub hansega diwana
har zulf se bichho lapkenge
ankhon se sharare tapkenge
sayyadon husn shikaron par
ghusse ka pasina phutega
moti ban kar rukhsaron par
is dhup mein chand sitaron par
ab khub hansega diwana
ab dudh na dengi bhainsen gaen
uf uf karne lagengi maen
bachche mam mam chikhenge
aur unghne wale nikhattu shauhar
''aql mujassam'' chikhenge
sab dirham barham chikhenge
ab khub hansega diwana
ab khanqahon ki murda udasi
roz-e-azal ki bhuki pyasi
jhumegi mai khanon par
ab saqi maghche pir-e-mughan
bechenge waaz dukanon par
un zahr bhare paimanon par
ab khub hansega diwana
zorawari se kamzoron ki
ab jeb kategi choron ki
aur mandi sahu karon ki
ab bhuki ''ho haq'' sair karegi
mandiyon aur bazaron ki
gat dekh ke duniya daron ki
ab khub hansega diwana
jina dil gurda dhundega
har zinda ''murda'' dhundega
koi kona khudra tah khana
ab har jangal mein mangal hoga
har basti mein wirana
ik naara laga kar mastana
ab khub hansega diwana
sard mehri
ab jara jhande garega
aur fel-e-falak chingharega
ab badal shor machaenge
ab bhut falak par charh daurenge
dharti ko dahlaenge
hansne ke maze ab aenge
ab khub hansega diwana
aiwan karenge bhaen bhaen
phuns ki jhonpariyon mein hawaen
saen saen gunjengi
is gunj mein bhuke nangon ki
sunsan sadaen gunjengi
wiran saraen gunjengi
ab khub hansega diwana
ab bijli ke koron se hua
shamshir bakaf zanjir ba pa
lohe ke rathon ko hankegi
ek ek dhuen ke mahmil se
sad husn ki malaka jhankegi
ab ag angare phankegi
ab khub hansega diwana
ab thandi ahon ke parnale
pale afat ke par kale
kande tole barsenge
ab ahan thanda par jaega
ahan ke gole barsenge
har sar par ole barsenge
ab khub hansega diwana
takhrib ki topen chhutengi
taamir ki kaliyan phutengi
har gorsitan shahi mein
bala-e-hawa zer-e-dariya
ghul hoga murgh-o-mahi mein
is nau abad tabahi mein
ab khub hansega diwana
ab nagin banbi garmaegi
sanp ki lali lahraegi
kale atish danon mein
danaiyan kenchli badlengi
shahron ke bandi khanon mein
aur dur khule maidanon mein
ab khub hansega diwana
bhus khali pet mein bhar na sakega
koi tijarat kar na sakega
sukri sukri khalon ki
ab mundh bhi jae to baj na sakegi
naubat paise walon ki
bekari par dallalon ki
ab khub hansega diwana
ab dal na jagiron ki galegi
ag magar din rat jalegi
chamre ke tannuron mein
ab kal parega ghalle ka
biwpariyon be maqduron mein
aur pet bhare mazduron mein
ab khub hansega diwana
ab garha pasina banne wale
orhe phirenge shal do shale
muft na jhulen jhulengi
phule hue gal ab pichkenge
pichki hui tonden phulengi
sab aqlen chaukari bhulengi
ab khub hansega diwana