یہ مت سمجھ کہ چاند ستاروں کے ساتھ ہوں

یہ مت سمجھ کہ چاند ستاروں کے ساتھ ہوں

سورج نہیں ہے بعد میں جس کے وہ رات ہوں

جو دوستی کا فرض نبھانے میں کٹ گیا

میں خاک پر پڑا وہ محبت کا ہات ہوں

یہ تیرے میرے بیچ نہیں جنگ آخری

تو بھی ابھی حیات ہے میں بھی حیات ہوں

احباب مجھ کو چھوڑ رہے ہیں تو چھوڑ جائیں

میں آپ اپنی ذات میں اک کائنات ہوں

یہ لوگ مجھ کو زہر بنانے پہ ہیں مصر

ورنہ مزاج سے تو میں آب حیات ہوں

قطرے سے بھی ہوں کم یہ سمندر کا انکسار

قطرے کو یہ گماں کہ سمندر صفات ہوں

کیفیؔ میں جیسے اپنے بزرگوں کا ہوں عصا

بچوں کی بھی کتاب قلم ہوں دوات ہوں

ye mat samajh ke chand sitaron ke sath hun

suraj nahin hai baad mein jis ke wo rat hun

jo dosti ka farz nibhane mein kat gaya

main khak par para wo mohabbat ka hat hun

ye tere mere bich nahin jang akhiri

tu bhi abhi hayat hai main bhi hayat hun

ahbab mujh ko chhor rahe hain to chhor jaen

main ap apni zat mein ik kainat hun

ye log mujh ko zahr banane pe hain musir

warna mizaj se to main ab-e-hayat hun

qatre se bhi hun kam ye samundar ka inkisar

qatre ko ye guman ke samundar sifat hun

kaifi mein jaise apne buzurgon ka hun asa

bachchon ki bhi kitab-e-qalam hun dawat hun