Arooz is now on the App Store, for iPhone and iPad. Download →

All poetry

انشاؔ جی یہ کون آیا کس دیس کا باسی ہے

Ibn-e-Insha (1927–1978)

انشاؔ جی یہ کون آیا کس دیس کا باسی ہے

ہونٹوں پہ تبسم ہے آنکھوں میں اداسی ہے

خوابوں کے گلستاں کی خوشبوئے دل آرا ہے

یا صبح تمنا کے ماتھے کا ستارا ہے

ترسی ہوئی نظروں کو اب اور نہ ترسا رے

اے حسن کے سوداگر اے روپ کے بنجارے

رمنا دل انشاؔ کا اب تیرا ٹھکانا ہو

اب کوئی بھی صورت ہو اب کوئی بہانا ہو

خاکستر دل کو ہے پھر شعلہ بجاں ہونا

حیرت کا جہاں ہونا حسرت کا نشاں ہونا

اے شخص جو تو آکر یوں دل میں سمایا ہے

تو درد کہ درماں ہے تو دھوپ کہ سایا ہے؟

نیناں ترے جادو ہیں گیسو ترے خوشبو ہیں

باتیں کسی جنگل میں بھٹکا ہوا آہو ہیں

مقصود وفا سن لے کیا صاف ہے سادہ ہے

جینے کی تمنا ہے مرنے کا ارادہ ہے