شہر دل کی گلیوں میں

شہر دل کی گلیوں میں

شام سے بھٹکتے ہیں

چاند کے تمنائی

بے قرار سودائی

دل گداز تاریکی

روح و جاں کو ڈستی ہے

روح و جاں میں بستی ہے

شہر دل کی گلیوں میں

تاک شب کی بیلوں پر

شبنمیں سرشکوں کی

بیقرار لوگوں نے

بے شمار لوگوں نے

یادگار چھوڑی ہے

اتنی بات تھوڑی ہے

صد ہزار باتیں تھیں

حیلۂ شکیبائی

صورتوں کی زیبائی

قامتوں کی رعنائی

ان سیاہ راتوں میں

ایک بھی نہ یاد آئی

جا بجا بھٹکتے ہیں

کس کی راہ تکتے ہیں

چاند کے تمنائی

یہ نگر کبھی پہلے

اس قدر نہ ویراں تھا

کہنے والے کہتے ہیں

قریۂ نگاراں تھا

خیر اپنے جینے کا

یہ بھی ایک ساماں تھا

آج دل میں ویرانی

ابر بن کے گھر آئی

آج دل کو کیا کہیے

با وفا نہ ہرجائی

پھر بھی لوگ دیوانے

آ گئے ہیں سمجھانے

اپنی وحشت دل کے

بن لیے ہیں افسانے

خوش خیال دنیا نے

گرمیاں تو جاتی ہیں

وہ رتیں بھی آتیں ہیں

جب ملول راتوں میں

دوستوں کی باتوں میں

جی نہ چین پائے گا

اور اوب جائے گا

آہٹوں سے گونجے گی

شہر دل کی پہنائی

اور چاند راتوں میں

چاندنی کے شیدائی

ہر بہانے نکلیں گے

آزمانے نکلیں گے

آرزو کی گہرائی

ڈھونڈنے کو رسوائی

سرد سرد راتوں کو

زرد چاند بخشے گا

بے حساب تنہائی

بے حجاب تنہائی

شہر دل کی گلیوں میں

shahr-e-dil ki galiyon mein

sham se bhatakte hain

chand ke tamannai

be qarar saudai

dil gudaz tariki

ruh-o-jan ko dasti hai

ruh-o-jan mein basti hai

shahr-e-dil ki galiyon mein

tak shab ki bilon par

shabnamen sarishkon ki

beqarar logon ne

be shumar logon ne

yadgar chhori hai

itni bat thori hai

sad hazar baten thin

hila-e-shakebai

suraton ki zebai

qamaton ki raanai

un siyah raton mein

ek bhi na yad ai

ja baja bhatakte hain

kis ki rah takte hain

chand ke tamannai

ye nagar kabhi pahle

is qadar na wiran tha

kahne wale kahte hain

qarya-e-nigaran tha

khair apne jine ka

ye bhi ek saman tha

aj dil mein wirani

abr ban ke ghar ai

aj dil ko kya kahiye

ba wafa na harjai

phir bhi log diwane

a gae hain samjhane

apni wahshat-e-dil ke

ban liye hain afsane

khush khayal duniya ne

garmiyan to jati hain

wo ruten bhi atin hain

jab malul raton mein

doston ki baton mein

ji na chain paega

aur ub jaega

ahaton se gunjegi

shahr-e-dil ki pahnai

aur chand raton mein

chandni ke shaidai

har bahane niklenge

azmane niklenge

arzu ki gahrai

dhundne ko ruswai

sard sard raton ko

zard chand bakhshega

be hisab tanhai

be hijab tanhai

shahr-e-dil ki galiyon mein