یاد ہے آغاز الفت کا زمانہ یاد ہے

یاد ہے آغاز الفت کا زمانہ یاد ہے

ڈال کر بانہوں میں بانہیں مسکرانا یاد ہے

خم بہ خم زلفوں کا وہ چہرے پہ میرے لوٹنا

بھینی بھینی نکہتوں میں ڈوب جانا یاد ہے

سرخیوں سے وہ جھلک اٹھنا رخ ضو ریز سے

لیتے لیتے نام میرا جھینپ جانا یاد ہے

آگے بڑھ بڑھ کر پلٹنا اور پھر رکنا مرا

اس طرح دل کا مچلنا تلملانا یاد ہے

وہ مری بیتابیٔ دل سے تری بے تابیاں

وہ مرے شکوؤں پہ تیرا سر جھکانا یاد ہے

وہ مری پژمردنی سے تیرا ہو جانا اداس

وہ مجھے بھولی اداؤں سے ہنسانا یاد ہے

گر کبھی خلوت میں چھیڑا قصۂ شام فراق

مسکرانا مسکرا کر ٹال جانا یاد ہے

بے جھجک ملتے تھے مجھ سے پاس آتے تھے مرے

وہ گھڑی وہ وقت وہ دل کش زمانہ یاد ہے

سوچ کر انجام الفت کچھ جھجکنا خود بخود

دم بہ دم گھبرا کے مجھ کو آزمانا یاد ہے

وہ مرا جذبات سے گھبرا کے تجھ سے روٹھنا

آب دیدہ ہو کے وہ تیرا منانا یاد ہے

یاد جس کی خون کے آنسو رلائے گی حبیبؔ

وہ حکایت یاد ہے اور وہ فسانہ یاد ہے

yad hai aghaz-e-ulfat ka zamana yad hai

dal kar banhon mein banhen muskurana yad hai

kham ba kham zulfon ka wo chehre pe mere lautna

bhini bhini nikhaton mein dub jana yad hai

surkhiyon se wo jhalak uthna rukh-e-zau rez se

lete lete nam mera jhinp jana yad hai

age barh barh kar palatna aur phir rukna mira

is tarah dil ka machalna tilmilana yad hai

wo miri betabi-e-dil se tiri be tabiyan

wo mire shakoun pe tera sar jhukana yad hai

wo miri pazhmardni se tera ho jana udas

wo mujhe bhuli adaon se hansana yad hai

gar kabhi khalwat mein chhera qissa-e-sham-e-firaq

muskurana muskura kar tal jana yad hai

be jhijak milte the mujh se pas ate the mire

wo ghari wo waqt wo dil kash zamana yad hai

soch kar anjam ulfat kuchh jhijakna khud bakhud

dam ba dam ghabra ke mujh ko azmana yad hai

wo mira jazbat se ghabra ke tujh se ruthna

ab dida ho ke wo tera manana yad hai

yad jis ki khun ke ansu rulaegi habib

wo hikayat yad hai aur wo fasana yad hai