خاک کے ذروں کو تنویر نظر دیتا ہے وہ

خاک کے ذروں کو تنویر نظر دیتا ہے وہ

پھول کی پتی کو لوہے کا جگر دیتا ہے وہ

جب اسے مہمیز کرتی ہے تخیل کی ادا

ظلمت شب کو تجلیٔ سحر دیتا ہے وہ

سازش بربادئ عالم جہاں جب بھی ہوئی

ساری دنیا جاگ جاتی ہے خبر دیتا ہے وہ

جب رگ جمہوریت کو کاٹنے بڑھتا ہے ظلم

بے گناہی صبر کرتی ہے اثر دیتا ہے وہ

اس قدر فطرت کے حسن دل ربا پر ہے فدا

طالب سر ہو اگر فطرت تو سر دیتا ہے وہ

خود تہی دامن سہی لیکن زر اخلاص سے

دامن تہذیب انسانی کو بھر دیتا ہے وہ

عظمت آدم سے کر کے منضبط اپنا سخن

غم زدوں کو جرأت ذوق سفر دیتا ہے وہ

موت کو تسخیر کر کے قوت ادراک سے

مردنی چہروں کو جینے کا ہنر دیتا ہے وہ

قلب شاعر کو ملی ہیں عشق کی سب برکتیں

عشق ہی سے قلب آہن موم کر دیتا ہے وہ

khak ke zarron ko tanwir-e-nazar deta hai wo

phul ki patti ko lohe ka jigar deta hai wo

jab use mohmiz karti hai takhayyul ki ada

zulmat-e-shab ko tajalli-e-sahar deta hai wo

sazish-e-barbadi-e-alam jahan jab bhi hui

sari duniya jag jati hai khabar deta hai wo

jab rag-e-jamhuriyat ko katne barhta hai zulm

be gunahi sabr karti hai asar deta hai wo

is qadar fitrat ke husn-e-dil ruba par hai fida

talib-e-sar ho agar fitrat to sar deta hai wo

khud tahi daman sahi lekin zar-e-ikhlas se

daman-e-tahzib-e-insani ko bhar deta hai wo

azmat adam se kar ke munzabit apna sukhan

gham zadon ko jurat zauq-e-safar deta hai wo

maut ko taskhir kar ke quwwat-e-idrak se

murdani chehron ko jine ka hunar deta hai wo

qalb-e-shayar ko mili hain ishq ki sab barkaten

ishq hi se qalb-e-ahan mom kar deta hai wo