خطۂ ارض پہ کیا شان ہے تیری اردو

خطۂ ارض پہ کیا شان ہے تیری اردو

تو مری زیست کا ارمان ہے میری اردو

تجھ کو بخشا گیا دنیا میں معلیٰ کا خطاب

تو وہ جوہر ہے کہ تیرا نہیں دنیا میں جواب

گلشن دہر میں موجود ہے خوشبو کی طرح

تو ہے صحرائے خیالات میں آہو کی طرح

تیری عظمت کوئی اشرفؔ کی زباں سے پوچھے

نفس مضموں ترا خسروؔ کے بیاں سے پوچھے

یوں تو کہنے کو وطن ہے ترا یہ بر صغیر

مگر اے لیلاے‌ٔ جاں تیرا ہر اک دل ہے اسیر

تجھ پہ نازاں تھی قلی قطبؔ کے جذبات کی رو

کبھی دلی تو کبھی لکھنؤ پہنچی تری ضو

تجھ کو اعزاز عجب شاہجہاں نے بخشا

لطف شائستگی سوداؔ کی زباں نے بخشا

آ گیا دل میں ترے میرتقی میرؔ کا سوز

دے گیا درد کی لذت تجھے دلگیرؔ کا سوز

مومنؔ و ذوقؔ کے افکار تجھے راس آئے

ذہن غالبؔ کے خیالات ترے پاس آئے

آ گیا تیرے کف دست میں عالم کا ضمیر

کر گئے تجھ کو سرافراز انیسؔ اور دبیرؔ

داغؔ نے تجھ کو دیئے عشق کے انداز نئے

فکر اقبالؔ سے کیا کیا نہ ملے راز نئے

جوشؔ کی شعلہ بیانی نے تجھے دی وسعت

آرزوؔ کی ہمہ دانی نے تجھے دی وقعت

کر گیا تجھ کو بلند آل رضاؔ کا اسلوب

دے گیا لہجۂ نو فیضؔ کا دھیما اسلوب

شادی و غم میں تجھے یاد کیا کرتے ہیں

تیری آواز میں فریاد کیا کرتے ہیں

khitta-e-arz pe kya shan hai teri urdu

tu miri zist ka arman hai meri urdu

tujh ko bakhsha gaya duniya mein mualla ka khitab

to wo jauhar hai ke tera nahin duniya mein jawab

gulshan-e-dahr mein maujud hai khushbu ki tarah

tu hai sahra-e-khayalat mein ahu ki tarah

teri azmat koi ashraf ki zaban se puchhe

nafas mazmun tira khusrau ke bayan se puchhe

yun to kahne ko watan hai tira ye bar saghir

magar ai lila-e-jan tera har ik dil hai asir

tujh pe nazan thi quli qutb ke jazbat ki ro

kabhi dili to kabhi lakhnau pahunchi tiri zau

tujh ko ezaz ajab shahjahan ne bakhsha

lutf-e-shaistagi sauda ki zaban ne bakhsha

a gaya dil mein tire mirtaqi mir ka soz

de gaya dard ki lazzat tujhe dilgir ka soz

momin-o-zauq ke afkar tujhe ras ae

zehn-e-ghalib ke khayalat tire pas ae

a gaya tere kaf-e-dast mein alam ka zamir

kar gae tujh ko sarafraz unnis aur dabir

dagh ne tujh ko diye ishq ke andaz nae

fikr iqbal se kya kya na mile raz nae

josh ki shola bayani ne tujhe di wusat

arzu ki hama dani ne tujhe di waqat

kar gaya tujh ko buland al raza ka uslub

de gaya lahja-e-nau faiz ka dhima uslub

shadi-o-gham mein tujhe yad kya karte hain

teri awaz mein fariyad kiya karte hain