زندگی نام ہے تغیر کا

زندگی نام ہے تغیر کا

گر تغیر نہ ہو تو زیست محال

ذرہ ذرہ ہے انقلاب پذیر

یہی فطرت کی آرزو کا کمال

روک لے راستہ مشیت کا

کس کی طاقت ہے اور کس کی مجال

ایک گہرا سا ربط قائم ہے

درمیان رہ فراق و وصال

لوگ آتے ہیں لوگ جاتے ہیں

ہے یہی اپنی زندگی کا مآل

جب ترقی کے مرحلے ہوں طے

ملک و ملت کا لازمی ہے خیال

تن کی پاکیزگی بھی اچھی ہے

من کی پاکیزگی ہے حسن خصال

مہر و الفت کا درس عام کریں

بانٹنے سب میں ہے یہ آب زلال

بخش دیں گر کوئی کرے تقصیر

یہ ہے انسانیت کا اوج کمال

راستہ ہو غلط تو رک جاؤ

نہ چلو چال جو ہو ٹیڑھی چال

بھول کر بھی نہ ایسا کام کریں

جس سے حاصل ہو رنج و حزن و ملال