وہ جس کی دید میں لاکھوں مسرتیں پنہاں

وہ جس کی دید میں لاکھوں مسرتیں پنہاں

وہ حسن جس کی تمنا میں جنتیں پنہاں

ہزار فتنے تہ پائے ناز خاک نشیں

ہر اک نگاہ خمار شباب سے رنگیں

شباب جس سے تخیل پہ بجلیاں برسیں

وقار جس کی رفاقت کو شوخیاں ترسیں

ادائے لغزش پا پر قیامتیں قرباں

بیاض رخ پہ سحر کی صباحتیں قرباں

سیاہ زلفوں میں وارفتہ نکہتوں کا ہجوم

طویل راتوں کی خوابیدہ راحتوں کا ہجوم

وہ آنکھ جس کے بناؤ پہ خالق اترائے

زبان شعر کو تعریف کرتے شرم آئے

وہ ہونٹ فیض سے جن کے بہار لالہ فروش

بہشت و کوثر و تسنیم و سلسبیل بہ دوش

گداز جسم قبا جس پہ سج کے ناز کرے

دراز قد جسے سرو سہی نماز کرے

غرض وہ حسن جو محتاج وصف و نام نہیں

وہ حسن جس کا تصور بشر کا کام نہیں

کسی زمانے میں اس رہگزر سے گزرا تھا

بصد غرور و تجمل ادھر سے گزرا تھا

اور اب یہ راہگزر بھی ہے دل فریب و حسیں

ہے اس کی خاک میں کیف شراب و شعر مکیں

ہوا میں شوخیٔ رفتار کی ادائیں ہیں

فضا میں نرمیٔ گفتار کی صدائیں ہیں

غرض وہ حسن اب اس رہ کا جزو منظر ہے

نیاز عشق کو اک سجدہ گہ میسر ہے

wo jis ki did mein lakhon masarraten pinhan

wo husn jis ki tamanna mein jannaten pinhan

hazar fitne tah pae naz khak nashin

har ik nigah-e-khumar-e-shabab se rangin

shabab jis se takhayyul pe bijliyan barsen

waqar jis ki rifaqat ko shokhiyan tarsen

ada-e-laghzish-e-pa par qayamaten qurban

bayaz rukh pe sahar ki sabahaten qurban

siyah zulfon mein warafta nikhaton ka hujum

tawil raton ki khwabida rahaton ka hujum

wo ankh jis ke banao pe khaliq itrae

zaban-e-sher ko taarif karte sharm ae

wo hont faiz se jin ke bahar-e-lala farosh

bahisht-o-kausar-o-tasnim-o-salsabil ba dosh

gudaz jism qaba jis pe saj ke naz kare

daraz qad jise sarw sahi namaz kare

gharaz wo husn jo mohtaj-e-wasf-o-nam nahin

wo husn jis ka tasawwur bashar ka kam nahin

kisi zamane mein is rahguzar se guzra tha

basad ghurur-o-tajammul idhar se guzra tha

aur ab ye rahguzar bhi hai dil fareb-o-hasin

hai us ki khak mein kaif-e-sharab-o-sher makin

hawa mein shokhi-e-raftar ki adaen hain

faza mein narmi-e-guftar ki sadaen hain

gharaz wo husn ab is rah ka juzw manzar hai

niyaz-e-ishq ko ik sajda gah muyassar hai