Arooz is now on the App Store, for iPhone and iPad. Download →

All poetry

سلام لکھتا ہے شاعر تمہارے حسن کے نام

Faiz Ahmad Faiz (1911–1984)

سلام لکھتا ہے شاعر تمہارے حسن کے نام

بکھر گیا جو کبھی رنگ پیرہن سر بام

نکھر گئی ہے کبھی صبح دوپہر کبھی شام

کہیں جو قامت زیبا پہ سج گئی ہے قبا

چمن میں سرو و صنوبر سنور گئے ہیں تمام

بنی بساط غزل جب ڈبو لیے دل نے

تمہارے سایۂ رخسار و لب میں ساغر و جام

سلام لکھتا ہے شاعر تمہارے حسن کے نام

تمہارے ہاتھ پہ ہے تابش حنا جب تک

جہاں میں باقی ہے دلدارئ عروس سخن

تمہارا حسن جواں ہے تو مہرباں ہے فلک

تمہارا دم ہے تو دم ساز ہے ہوائے وطن

اگرچہ تنگ ہیں اوقات سخت ہیں آلام

تمہاری یاد سے شیریں ہے تلخئ ایام

سلام لکھتا ہے شاعر تمہارے حسن کے نام