بہار آئی تو جیسے یک بار

بہار آئی تو جیسے یک بار

لوٹ آئے ہیں پھر عدم سے

وہ خواب سارے شباب سارے

جو تیرے ہونٹوں پہ مر مٹے تھے

جو مٹ کے ہر بار پھر جئے تھے

نکھر گئے ہیں گلاب سارے

جو تیری یادوں سے مشکبو ہیں

جو تیرے عشاق کا لہو ہیں

ابل پڑے ہیں عذاب سارے

ملال احوال دوستاں بھی

خمار آغوش مہ وشاں بھی

غبار خاطر کے باب سارے

ترے ہمارے

سوال سارے جواب سارے

بہار آئی تو کھل گئے ہیں

نئے سرے سے حساب سارے

bahar ai to jaise yak bar

laut ae hain phir adam se

wo khwab sare shabab sare

jo tere honton pe mar mite the

jo mit ke har bar phir jiye the

nikhar gae hain gulab sare

jo teri yadon se mushkbu hain

jo tere ushshaq ka lahu hain

ubal pare hain azab sare

malal ahwal dostan bhi

khumar aghosh-e-mah washan bhi

ghubar-e-khatir ke bab sare

tire hamare

sawal sare jawab sare

bahar ai to khul gae hain

nae sire se hisab sare