تم نہ آئے تھے تو ہر اک چیز وہی تھی کہ جو ہے

تم نہ آئے تھے تو ہر اک چیز وہی تھی کہ جو ہے

آسماں حد نظر راہ گزر راہ گزر شیشۂ مے شیشۂ مے

اور اب شیشۂ مے راہ گزر رنگ فلک

رنگ ہے دل کا مرے خون جگر ہونے تک

چمپئی رنگ کبھی راحت دیدار کا رنگ

سرمئی رنگ کہ ہے ساعت بیزار کا رنگ

زرد پتوں کا خس و خار کا رنگ

سرخ پھولوں کا دہکتے ہوئے گلزار کا رنگ

زہر کا رنگ لہو رنگ شب تار کا رنگ

آسماں راہ گزر شیشۂ مے

کوئی بھیگا ہوا دامن کوئی دکھتی ہوئی رگ

کوئی ہر لحظہ بدلتا ہوا آئینہ ہے

اب جو آئے ہو تو ٹھہرو کہ کوئی رنگ کوئی رت کوئی شے

ایک جگہ پر ٹھہرے

پھر سے اک بار ہر اک چیز وہی ہو کہ جو ہے

آسماں حد نظر راہ گزر راہ گزر شیشۂ مے شیشۂ مے

tum na ae the to har ik chiz wahi thi ke jo hai

asman had-e-nazar rah guzar rah guzar shisha-e-mai shisha-e-mai

aur ab shisha-e-mai rah guzar rang-e-falak

rang hai dil ka mire khun-e-jigar hone tak

champai rang kabhi rahat didar ka rang

surmai rang ke hai saat bezar ka rang

zard patton ka khas-o-khar ka rang

surkh phulon ka dahakte hue gulzar ka rang

zahr ka rang lahu rang-e-shab-e-tar ka rang

asman rah guzar shisha-e-mai

koi bhiga hua daman koi dikhti hui rag

koi har lahza badalta hua aina hai

ab jo ae ho to thahro ke koi rang koi rut koi shai

ek jagah par thahre

phir se ik bar har ik chiz wahi ho ke jo hai

asman had-e-nazar rah guzar rah guzar shisha-e-mai shisha-e-mai