اشکوں کو اپنی آنکھ میں پیہم لیے ہوئے

اشکوں کو اپنی آنکھ میں پیہم لیے ہوئے

ہم چل رہے ہیں جیسے شرابی پیے ہوئے

کیا جانے کیا ہوا ہے کہ دیوانہ رو پڑا

لیلیٰ گئی ہے دشت سے پردہ کیے ہوئے

اب کے شب فراق کا عالم نہ پوچھیے

مایوس اب سحر سے ہمارے دیے ہوئے

یہ ارتقا ہے ان کا کہ پستی کی ابتدا

بین السطور تھے جو وہ اب حاشیے ہوئے

الزام ہم پہ رکھ کے وہ اٹھے چلے گئے

بیٹھے رہے ہم اپنے لبوں کو سیے ہوئے

اب انتظار نامہ براں ختم ہو چکا

نا پید اپنے شہر سے اب ڈاکئے ہوئے

اچھی زمیں میں شعر بھی اچھے ہوئے مگر

دانشؔ کمال تنگ ترے قافیے ہوئے

ashkon ko apni ankh mein paiham liye hue

ham chal rahe hain jaise sharabi piye hue

kya jane kya hua hai ke diwana ro para

laila gai hai dasht se parda kiye hue

ab ke shab-e-firaq ka alam na puchhiye

mayus ab sahar se hamare diye hue

ye irtiqa hai un ka ke pasti ki ibtida

bain alssutur the jo wo ab hashiye hue

ilzam ham pe rakh ke wo uthe chale gae

baithe rahe ham apne labon ko saye hue

ab intizar nama baran khatm ho chuka

na paid apne shahr se ab dakiye hue

achchhi zamin mein sher bhi achchhe hue magar

danish kamal tang tire qafiye hue