وہ وقت مری جان بہت دور نہیں ہے

وہ وقت مری جان بہت دور نہیں ہے

جب درد سے رک جائیں گی سب زیست کی راہیں

اور حد سے گزر جائے گا اندوہ نہانی

تھک جائیں گی ترسی ہوئی ناکام نگاہیں

چھن جائیں گے مجھ سے مرے آنسو مری آہیں

چھن جائے گی مجھ سے مری بے کار جوانی

شاید مری الفت کو بہت یاد کرو گی

اپنے دل معصوم کو ناشاد کرو گی

آؤگی مری گور پہ تم اشک بہانے

نوخیز بہاروں کے حسیں پھول چڑھانے

شاید مری تربت کو بھی ٹھکرا کے چلوگی

شاید مری بے سود وفاؤں پہ ہنسوگی

اس وضع کرم کا بھی تمہیں پاس نہ ہوگا

لیکن دل ناکام کو احساس نہ ہوگا

القصہ مآل غم الفت پہ ہنسو تم

یا اشک بہاتی رہو فریاد کرو تم

ماضی پہ ندامت ہو تمہیں یا کہ مسرت

خاموش پڑا سوئے گا واماندۂ الفت

wo waqt miri jan bahut dur nahin hai

jab dard se ruk jaengi sab zist ki rahen

aur had se guzar jaega andoh-e-nihani

thak jaengi tarsi hui nakam nigahen

chhin jaenge mujh se mire ansu miri ahen

chhin jaegi mujh se miri be kar jawani

shayad miri ulfat ko bahut yad karogi

apne dil maasum ko nashad karogi

aogi miri gor pe tum ashk bahane

naukhez baharon ke hasin phul charhane

shayad miri turbat ko bhi thukra ke chalogi

shayad miri be sud wafaon pe hansogi

is waz-e-karam ka bhi tumhen pas na hoga

lekin dil-e-nakam ko ehsas na hoga

alqissa maal-e-gham ulfat pe hanso tum

ya ashk bahati raho fariyad karo tum

mazi pe nadamat ho tumhen ya ke masarrat

khamosh para su-e-ga wamanda-e-ulfat