آئیے ہاتھ اٹھائیں ہم بھی

آئیے ہاتھ اٹھائیں ہم بھی

ہم جنہیں رسم دعا یاد نہیں

ہم جنہیں سوز محبت کے سوا

کوئی بت کوئی خدا یاد نہیں

آئیے عرض گزاریں کہ نگار ہستی

زہر امروز میں شیرینی فردا بھر دے

وہ جنہیں تاب گراں باری ایام نہیں

ان کی پلکوں پہ شب و روز کو ہلکا کر دے

جن کی آنکھوں کو رخ صبح کا یارا بھی نہیں

ان کی راتوں میں کوئی شمع منور کر دے

جن کے قدموں کو کسی رہ کا سہارا بھی نہیں

ان کی نظروں پہ کوئی راہ اجاگر کر دے

جن کا دیں پیروی کذب و ریا ہے ان کو

ہمت کفر ملے جرأت تحقیق ملے

جن کے سر منتظر تیغ جفا ہیں ان کو

دست قاتل کو جھٹک دینے کی توفیق ملے

عشق کا سر نہاں جان تپاں ہے جس سے

آج اقرار کریں اور تپش مٹ جائے

حرف حق دل میں کھٹکتا ہے جو کانٹے کی طرح

آج اظہار کریں اور خلش مٹ جائے

aiye hath uthaen ham bhi

ham jinhen rasm-e-dua yad nahin

ham jinhen soz-e-mohabbat ke siwa

koi but koi khuda yad nahin

aiye arz guzaren ke nigar-e-hasti

zahr imroz mein shirini-e-farda bhar de

wo jinhen tab-e-giran bari-e-ayyam nahin

un ki palkon pe shab-o-roz ko halka kar de

jin ki ankhon ko rukh-e-subh ka yara bhi nahin

un ki raton mein koi shama munawwar kar de

jin ke qadmon ko kisi rah ka sahara bhi nahin

un ki nazron pe koi rah ujagar kar de

jin ka den pairawi-e-kizb-o-riya hai un ko

himmat kufr mile jurat tahqiq mile

jin ke sar muntazir-e-tegh-e-jafa hain un ko

dast-e-qatil ko jhatak dene ki taufiq mile

ishq ka sar-e-nihan jan-e-tapan hai jis se

aj iqrar karen aur tapish mit jae

harf-e-haq dil mein khatakta hai jo kante ki tarah

aj izhar karen aur khalish mit jae