وہ شخص آج مجھ کو ایک آئنہ دکھا گیا

وہ شخص آج مجھ کو ایک آئنہ دکھا گیا

طلب کے بھی اصول ہیں یہی مجھے بتا گیا

یہ قاعدے کی بات تھی طلب مری بھی شاد ہو

ذرا سا تھا مطالبہ وہ بے نقط سنا گیا

شبان ہجر میں مرا جو ہم نفس بنا رہا

وصال رت جب آ گئی وہ میرا آشنا گیا

عرب کے ریگزار میں چھپی ہوئی بہار تھی

اٹھا جب ایک شخص تو گلاب سب کھلا گیا

نیا نیا سا عہد ہے نئی نئی روایتیں

کتاب میں وہ پنکھڑی کا سلسلہ چلا گیا

میں ایک دھندلے عکس کو لپک رہا تھا خواب میں

وہ بچپنے سا لگ رہا تھا جو گیا گیا گیا

وہ درد آشنا مرا وہ ہم نفس وہ ہم نشیں

ذرا سی بات پر مجھے ہی اجنبی بنا گیا

جناب دانش عصریؔ آپ سوچنا ہی چھوڑ دیں

کہیں رکا نہیں ہے وہ بحد انتہا گیا

wo shakhs aj mujh ko ek aina dikha gaya

talab ke bhi usul hain yahi mujhe bata gaya

ye qaide ki bat thi talab miri bhi shad ho

zara sa tha mutaliba wo be naqat suna gaya

shabin hijr mein mira jo ham nafas bana raha

wisal rut jab a gai wo mera ashna gaya

arab ke regzar mein chhupi hui bahar thi

utha jab ek shakhs to gulab sab khula gaya

naya naya sa ahd hai nai nai riwayaten

kitab mein wo pankhuri ka silsila chala gaya

main ek dhundle aks ko lapak raha tha khwab mein

wo bachpane sa lag raha tha jo gaya gaya gaya

wo dard ashna mira wo ham nafas wo ham nashin

zara si bat par mujhe hi ajnabi bana gaya

janab-e-danish asri ap sochna hi chhor den

kahin ruka nahin hai wo bahad intiha gaya