تیرے ہونٹوں کے پھولوں کی چاہت میں ہم

تیرے ہونٹوں کے پھولوں کی چاہت میں ہم

دار کی خشک ٹہنی پہ وارے گئے

تیرے ہاتوں کی شمعوں کی حسرت میں ہم

نیم تاریک راہوں میں مارے گئے

سولیوں پر ہمارے لبوں سے پرے

تیرے ہونٹوں کی لالی لپکتی رہی

تیری زلفوں کی مستی برستی رہی

تیرے ہاتھوں کی چاندی دمکتی رہی

جب گھلی تیری راہوں میں شام ستم

ہم چلے آئے لائے جہاں تک قدم

لب پہ حرف غزل دل میں قندیل غم

اپنا غم تھا گواہی ترے حسن کی

دیکھ قائم رہے اس گواہی پہ ہم

ہم جو تاریک راہوں پہ مارے گئے

نارسائی اگر اپنی تقدیر تھی

تیری الفت تو اپنی ہی تدبیر تھی

کس کو شکوہ ہے گر شوق کے سلسلے

ہجر کی قتل گاہوں سے سب جا ملے

قتل گاہوں سے چن کر ہمارے علم

اور نکلیں گے عشاق کے قافلے

جن کی راہ طلب سے ہمارے قدم

مختصر کر چلے درد کے فاصلے

کر چلے جن کی خاطر جہانگیر ہم

جاں گنوا کر تری دلبری کا بھرم

ہم جو تاریک راہوں میں مارے گئے

tere honton ke phulon ki chahat mein ham

dar ki khushk tahni pe ware gae

tere hatun ki shamon ki hasrat mein ham

nim tarik rahon mein mare gae

suliyon par hamare labon se pare

tere honton ki lali lapakti rahi

teri zulfon ki masti barasti rahi

tere hathon ki chandi damakti rahi

jab ghuli teri rahon mein sham-e-sitam

ham chale ae lae jahan tak qadam

lab pe harf-e-ghazal dil mein qindil-e-gham

apna gham tha gawahi tire husn ki

dekh qaim rahe is gawahi pe ham

ham jo tarik rahon pe mare gae

narasai agar apni taqdir thi

teri ulfat to apni hi tadbir thi

kis ko shikwa hai gar shauq ke silsile

hijr ki qatl gahon se sab ja mile

qatl gahon se chun kar hamare alam

aur niklenge ushshaq ke qafile

jin ki rah-e-talab se hamare qadam

mukhtasar kar chale dard ke fasle

kar chale jin ki khatir jahangir ham

jan ganwa kar tiri dilbari ka bharam

ham jo tarik rahon mein mare gae