چند روز اور مری جان فقط چند ہی روز

چند روز اور مری جان فقط چند ہی روز

ظلم کی چھاؤں میں دم لینے پہ مجبور ہیں ہم

اور کچھ دیر ستم سہہ لیں تڑپ لیں رو لیں

اپنے اجداد کی میراث ہے معذور ہیں ہم

جسم پر قید ہے جذبات پہ زنجیریں ہیں

فکر محبوس ہے گفتار پہ تعزیریں ہیں

اپنی ہمت ہے کہ ہم پھر بھی جیے جاتے ہیں

زندگی کیا کسی مفلس کی قبا ہے جس میں

ہر گھڑی درد کے پیوند لگے جاتے ہیں

لیکن اب ظلم کی میعاد کے دن تھوڑے ہیں

اک ذرا صبر کہ فریاد کے دن تھوڑے ہیں

عرصۂ دہر کی جھلسی ہوئی ویرانی میں

ہم کو رہنا ہے پہ یوں ہی تو نہیں رہنا ہے

اجنبی ہاتھوں کا بے نام گراں بار ستم

آج سہنا ہے ہمیشہ تو نہیں سہنا ہے

یہ ترے حسن سے لپٹی ہوئی آلام کی گرد

اپنی دو روزہ جوانی کی شکستوں کا شمار

چاندنی راتوں کا بے کار دہکتا ہوا درد

دل کی بے سود تڑپ جسم کی مایوس پکار

چند روز اور مری جان فقط چند ہی روز

chand roz aur miri jan faqat chand hi roz

zulm ki chhaon mein dam lene pe majbur hain ham

aur kuchh der sitam sah len tarap len ro len

apne ajdad ki miras hai maazur hain ham

jism par qaid hai jazbat pe zanjiren hain

fikr mahbus hai guftar pe taaziren hain

apni himmat hai ke ham phir bhi jiye jate hain

zindagi kya kisi muflis ki qaba hai jis mein

har ghari dard ke paiwand lage jate hain

lekin ab zulm ki miad ke din thore hain

ik zara sabr ke fariyad ke din thore hain

arsa-e-dahr ki jhulsi hui wirani mein

ham ko rahna hai pe yun hi to nahin rahna hai

ajnabi hathon ka be nam giran bar-e-sitam

aj sahna hai hamesha to nahin sahna hai

ye tire husn se lipti hui alam ki gard

apni do roza jawani ki shikaston ka shumar

chandni raton ka be kar dahakta hua dard

dil ki be sud tarap jism ki mayus pukar

chand roz aur miri jan faqat chand hi roz