ترا نشانہ ہوں میں تیر بن کے مجھ میں آ

ترا نشانہ ہوں میں تیر بن کے مجھ میں آ

میں اک فریم ہوں تصویر بن کے مجھ میں آ

بہت دنوں سے خوشی کی تلاش میں ہوں میں

تو کوئی حادثہ دلگیر بن کے مجھ میں آ

میں کوششیں تو اگر چاہوں کر ہی سکتا ہوں

مری تمنا ہے تقدیر بن کے مجھ میں آ

مرا درون بھی پھینکا ہوا ہے یوسف سا

کسی طرف سے کوئی عیر بن کے مجھ میں آ

گزشتہ عہد میں رومان لکھ چکا ہوں بہت

تو رقص چھوڑ دے زنجیر بن کے مجھ میں آ

میں عشق کھیل کی شکلیں بدلنے والا ہوں

شکاری اب کے تو نخچیر بن کے مجھ میں آ

جوان کر اسی پنجاب کی روایت کو

چناب چڑھتا ہے تو ہیر بن کے مجھ میں آ

ثقیل لفظوں میں لکھتا ہوں میں غزل اکثر

میں سوداؔ بنتا ہوں تو میرؔ بن کے مجھ میں آ

tira nishana hun main tir ban ke mujh mein a

main ik firem hun taswir ban ke mujh mein a

bahut dinon se khushi ki talash mein hun main

to koi hadisa dilgir ban ke mujh mein a

main koshishen to agar chahun kar hi sakta hun

miri tamanna hai taqdir ban ke mujh mein a

mira darun bhi phenka hua hai yusuf sa

kisi taraf se koi er ban ke mujh mein a

guzishta ahd mein ruman likh chuka hun bahut

tu raqs chhor de zanjir ban ke mujh mein a

main ishq khel ki shaklen badalne wala hun

shikari ab ke to nakhchir ban ke mujh mein a

jawan kar isi panjab ki riwayat ko

chunab charhta hai to hir ban ke mujh mein a

saqil lafzon mein likhta hun main ghazal aksar

main sauda banta hun to mir ban ke mujh mein a