سنو کہ عشق و محبت کا تاجدار ہوں میں

سنو کہ عشق و محبت کا تاجدار ہوں میں

محبتوں کے سفینے پہ اب سوار ہوں میں

گلاب کھلتے ہیں سینے میں میرے شعروں کے

سو شاخ گل کی طرح سے ہی خار دار ہوں میں

نہ ڈھونڈ اب تو مجھے زندگی کی راہوں میں

تری حیات کی گزری ہوئی بہار ہوں میں

یہ میرے شانے پہ جو سر ہے اک امانت ہے

صلیب عرصۂ ہستی پہ اک ادھار ہوں میں

خدائے پاک سفینہ اتار دے میرا

بہت زمانہ ہوا صرف انتظار ہوں میں

نہیں ہے خود مجھے اپنی ہی ذات پر کوئی حق

یہ کس نے کہہ دیا ہے اہل اختیار ہوں میں

ورق ورق پہ کئی نقش تھے نمایاں سے

انہی نقوش سے ابھرا سا اضطرار ہوں میں

خوشی کے نغمے سناؤں کہاں سے میں دانشؔ

غم و الم کی بہت لمبی اک قطار ہوں میں

suno ke ishq-o-mohabbat ka tajdar hun main

mohabbaton ke safine pe ab sawar hun main

gulab khulte hain sine mein mere sheron ke

so shakh-e-gul ki tarah se hi khar dar hun main

na dhund ab to mujhe zindagi ki rahon mein

tiri hayat ki guzri hui bahar hun main

ye mere shane pe jo sar hai ik amanat hai

salib-e-arsa-e-hasti pe ik udhar hun main

khuda-e-pak safina utar de mera

bahut zamana hua sirf-e-intizar hun main

nahin hai khud mujhe apni hi zat par koi haq

ye kis ne kah diya hai ahl-e-ikhtiyar hun main

waraq waraq pe kai naqsh the numayan se

unhi nuqush se ubhra sa iztirar hun main

khushi ke naghme sunaun kahan se main danish

gham-o-alam ki bahut lambi ik qatar hun main