اے دوست پرانے پہچانے

اے دوست پرانے پہچانے

ہم کتنی مدت بعد ملے

اور کتنی صدیوں بعد ملی

یہ ایک نگاہ مہر و سخا

جو اپنی سخا سے خود پر نم

بیٹھو تو ذرا

بتلاؤ تو کیا

یہ سچ ہے میرے تعاقب میں

پھرتا ہے ہجوم سنگ زناں؟

کیا نیل بہت ہیں چہرے پر؟

کیا کاسۂ سر ہے خون سے تر؟

پیوند قبا دشنام بہت

پیوست جگر الزام بہت

یہ نظر کرم کیوں ہے پر نم؟

جب نکلے کوئے ملامت میں

اک غوغا تو ہم نے بھی سنا

طفلاں کی تو کچھ تقصیر نہ تھی

ہم آپ ہی تھے یوں خود رفتہ

مدہوشی نے مہلت ہی نہ دی

ہم مڑ کے نظارہ کر لیتے

بچنے کی تو صورت خیر نہ تھی

درماں کا ہی چارہ کر لیتے

پل بھر بھی ہمارے کار جنوں

غفلت جو گوارہ کر لیتے

ai dost purane pahchane

ham kitni muddat baad mile

aur kitni sadiyon baad mili

ye ek nigah-e-mehr-o-sakha

jo apni sakha se khud pur nam

baitho to zara

batlao to kya

ye sach hai mere taaqub mein

phirta hai hujum-e-sang zanan?

kya nil bahut hain chehre par?

kya kasa-e-sar hai khun se tar?

paiwand qaba dushnam bahut

paiwast-e-jigar ilzam bahut

ye nazar karam kyun hai pur nam?

jab nikle ku-e-malamat mein

ik ghaugha to ham ne bhi suna

tiflan ki to kuchh taqsir na thi

ham ap hi the yun khud rafta

madhoshi ne mohlat hi na di

ham mur ke nazara kar lete

bachne ki to surat khair na thi

darman ka hi chara kar lete

pal bhar bhi hamare kar-e-junun

ghaflat jo gawara kar lete