Arooz is now on the App Store, for iPhone and iPad. Download →

All poetry

مجھ پہ الزام لگاتے ہو لگائے جاؤ

Danish Asari (b. 1991)

مجھ پہ الزام لگاتے ہو لگائے جاؤ

خون دل اپنا جلاتے ہو جلائے جاؤ

ہجر کی شب کوئی آسان نہیں ہوتی ہے

اشک تم اپنے بہاتے ہو بہائے جاؤ

عشق کامل کی ضمانت تمہیں میں دیتا ہوں

یہ مرا شعر جو تم گاتے ہو گائے جاؤ

قیس کے دشت میں لاتے ہو سواری اپنی

یعنی یوں دھوم مچاتے ہو مچائے جاؤ

جھیل کے پانی میں دو شعلہ نما ہونٹ غضب

ہائے کیا آگ لگاتے ہو لگائے جاؤ

میرے اشعار جو سمجھے نہ وہ مجھ کو سمجھے

یار تم خود کو تھکاتے ہو تھکائے جاؤ

ہم نے سوزش پہ محبت کی بنا رکھی ہے

تم اگر تاج بناتے ہو بنائے جاؤ

دانشؔ عصری کا تو مسلک ہے فقط دشت کی خاک

تم اگر گھر سے نبھاتے ہو نبھائے جاؤ