بڑی سہانی سی رات تھی وہ

بڑی سہانی سی رات تھی وہ

ہوا میں انجانی کھوئی کھوئی مہک رچی تھی

بہار کی خوش گوار حدت سے رات گلنار ہو رہی تھی

روپہلے سپنے سے آسماں پر سحاب بن کر بکھر گئے تھے

اور ایسی اک رات ایک آنگن میں کوئی لڑکی کھڑی ہوئی تھی

خموش تنہا

وہ اپنی نازک حسین سوچوں کے شہر میں کھو کے رہ گئی تھی

دھنک کے سب رنگ اس کی آنکھوں میں بھر گئے تھے

وہ ایسی ہی رات تھی کہ راہوں میں اس کی موتی بکھر گئے تھے

ہزار اچھوتے کنوارے سپنے

نظر میں اس کی چمک رہے تھے

شریر سی رات اس کو چپکے سے وہ کہانی سنا رہی تھی

کہ آج

وہ اپنی چوڑیوں کی کھنک سے شرمائی جا رہی تھی

bari suhani si rat thi wo

hawa mein anjani khoi khoi mahak rachi thi

bahar ki khush gawar hiddat se rat gulnar ho rahi thi

rupahle sapne se asman par sahab ban kar bikhar gae the

aur aisi ik rat ek angan mein koi larki khari hui thi

khamosh tanha

wo apni nazuk hasin sochon ke shahr mein kho ke rah gai thi

dhanak ke sab rang us ki ankhon mein bhar gae the

wo aisi hi rat thi ke rahon mein us ki moti bikhar gae the

hazar achhute kunware sapne

nazar mein us ki chamak rahe the

sharir si rat us ko chupke se wo kahani suna rahi thi

ke aj

wo apni chauriyon ki khanak se sharmai ja rahi thi