سخت سفاک

سخت سفاک

خود میں سمٹ کر چٹختی ہوئی برف

اور منجمد جسم و جاں

رات

جذبوں کی قبروں پہ کتبے کے مانند اٹکی ہوئی

ہاتھ کھرچے ہوئے سانس اکھڑی ہوئی

لفظ

گویا سماعت کے پردے سے ٹکرا کے چپکے ہوئے

برف پر

چار و نا چار، پیروں کی جمتی ہوئی انگلیاں

ہڈیوں کی دراڑوں میں گھستی ہوا

خون تک راہ پانے کی کوشش میں

ٹوٹی فصیلوں پہ یلغار کرتی ہوئی

دل بقا کے لیے خود سے لڑتا ہوا

خون پیتا ہوا اور اگلتا ہوا

کیسا بحران ہے دم نکلتا نہیں

سرد موسم کسی طور ٹلتا نہیں

جس قدر ہو سکے

گرتے پیڑوں کی شاخیں جلاتے رہو

آگ بجھنے نہ دو

sakht saffak

khud mein simat kar chatakhti hui barf

aur munjamid jism-o-jan

rat

jazbon ki qabron pe katbe ke manind atki hui

hath khurche hue sans ukhri hui

lafz

goya samaat ke parde se takra ke chupke hue

barf par

char-o-na char, pairon ki jamti hui ungliyan

haddiyon ki dararon mein ghisti hua

khun tak rah pane ki koshish mein

tuti fasilon pe yalghar karti hui

dil baqa ke liye khud se larta hua

khun pita hua aur ugalta hua

kaisa bohran hai dam nikalta nahin

sard mausam kisi taur talta nahin

jis qadar ho sake

girte peron ki shakhen jalate raho

ag bujhne na do