مجسم تقدس سفیدی میں ڈوبا

مجسم تقدس سفیدی میں ڈوبا

بڑی شان سے چھوٹی کھڑکی میں آیا

زمیں پر پڑے اک سروں کے سمندر

کو نظروں کا پرشاد دے کر

بہت عاجزی سے

محل کے کشادہ کسی کمرے میں کھو گیا

یقیناً عبادت کی خاطر

نیا سال آیا

مسیحائی تازہ لبوں پر سجا کر

چمکدار سونے کی لاٹھی سنبھالے

زری کے لباس کشادہ میں ملبوس دھیرے سے گویا ہوا

فقط عاجزی ہے علاج

بڑھو درد کے ماروں کو بڑھ کے تھامو

نہ چھوٹے یہ دامن کبھی عاجزی کا

عقیدت کا ہالہ گلے میں پڑی سرخ شال

اور اس پر زر و سیم و نقش و نگار

بہت بوجھ ہے وہ سنبھالے ہوئے

چھت اور حال اور سرخ پردوں پہ ہے وجد طاری

مگر اس سے عاری سمندر کے پار

بے ہنگم اگے خود رو جنگل کی اولاد

کولمبس کی نسلوں کے پیروں تلے کچی مٹی کے ڈھیر

قبیلوں کے کیڑے مکوڑے زمینوں کے بوجھ

سنبھالے ہوئے اپنے کانوں کے آنکھوں کے کشکول

جڑے دیکھنا چاہتے ہیں جو لرزیدہ اکڑے ہوئے ہاتھ

گھسٹتے چلے آئے ہیں رینگتے رینگتے

تقدس کو اپنی معافی کی خیرات دینے کے خوش فہم

ادب نا شناس

mujassam taqaddus safedi mein duba

bari shan se chhoti khirki mein aya

zamin par pare ik saron ke samundar

ko nazron ka parshad de kar

bahut ajizi se

mahal ke kushada kisi kamre mein kho gaya

yaqinan ibadat ki khatir

naya sal aya

masihai taza labon par saja kar

chamakdar sone ki lathi sambhale

zari ke libas kushada mein malbus dhire se goya hua

faqat ajizi hai ilaj

barho dard ke maron ko barh ke thamo

na chhote ye daman kabhi ajizi ka

aqidat ka hala gale mein pari surkh shal

aur us par zar-o-sim-o-naqsh-o-nigar

bahut bojh hai wo sambhale hue

chhat aur hal aur surkh pardon pe hai wajd tari

magar us se ari samundar ke par

be hangum uge khud ro jangal ki aulad

kolmbas ki naslon ke pairon tale kachchi mitti ke dher

qabilon ke kire makore zaminon ke bojh

sambhale hue apne kanon ke ankhon ke kashkol

jure dekhna chahte hain jo larzida akre hue hath

ghisatte chale ae hain rengte rengte

taqaddus ko apni muafi ki khairat dene ke khush fahm

adab na shanas