خوشی

خوشی

عدم کے کسی جھروکے

کی اوٹ سے جھانکتی نظر کا فریب کوئی

طویل بے رحم راستوں پر سراب کوئی

تمام شب جگنوؤں کو چننے کا خواب کوئی

خوشی

وہ رہ رہ کے چند لمحوں کو سانس لیتا حباب کوئی

اداس تاروں کو چھیڑتی انگلیوں کے زخموں

سے اٹھتے سر کے خیال میں گم رباب کوئی

خوشی

کہ میزان کے جزیروں سے دور اک بے نشان ساحل

زمانے بھر کی خلیج حائل

ابھرتی موجوں میں

غرق ہونے کی داستانوں کی جھلملاہٹ

جو چھونا چاہو

تو دسترس میں

کوئی جزیرہ نہ کوئی ساحل

یہ خاک اور آب کا توازن

یہ بند مٹھی سے ذرہ ذرہ پھسلتی مٹی

نظر میں کولاژ اک مجرد

ادھر گماں کی منڈیر پر کچھ نشان

عنقا کے بیٹھنے کا فریب جیسے

تو اس کنارے ترازو تھامے

مجسمے کی سفید آنکھوں پہ معنویت کی کالی پٹی

وہی سیاہی

اندھیرے کا ہے جو پیش خیمہ

وہ سنگ آنکھیں

کہ جن میں پتلی کبھی نہیں تھی

وہ جن کی تہ میں

کسی کرن کا گزر نہیں ہے

خوشی ہے کیا منصفی ہے کیا

کچھ خبر نہیں ہے

khushi

adam ke kisi jharoke

ki ot se jhankti nazar ka fareb koi

tawil be rahm raston par sarab koi

tamam shab jugnuon ko chunne ka khwab koi

khushi

wo rah rah ke chand lamhon ko sans leta habab koi

udas taron ko chherti ungliyon ke zakhmon

se uthte sar ke khayal mein gum rabab koi

khushi

ke mizan ke jaziron se dur ik be nishan sahil

zamane bhar ki khalij hail

ubharti maujon mein

gharq hone ki dastanon ki jhilmilahat

jo chhuna chaho

tu dastaras mein

koi jazira na koi sahil

ye khak aur ab ka tawazun

ye band mutthi se zarra zarra phisalti mitti

nazar mein kolazh ik mujarrad

idhar guman ki munder par kuchh nishan

anqa ke baithne ka fareb jaise

to us kinare tarazu thame

mujassame ki safed ankhon pe maanawiyyat ki kali piti

wahi siyahi

andhere ka hai jo pesh-e-khema

wo sang ankhen

ke jin mein putli kabhi nahin thi

wo jin ki tah mein

kisi kiran ka guzar nahin hai

khushi hai kya munsifi hai kya

kuchh khabar nahin hai