کس نے کھینچی ہیں لکیریں مرے دروازے پر

کس نے کھینچی ہیں لکیریں مرے دروازے پر

کون ہے جو کہ دبے پاؤں چلا آیا ہے

میرے بے رنگ ہیولے کا تعاقب کرتا

میں تو محتاط تھا ایسا کہیں آتے جاتے

اپنے سائے کو بھی پاتال میں چھوڑ آتا تھا

اپنا سامان اٹھاتا تو شب نصف پہر

دست ہشیار مٹاتا مرے قدموں کا سراغ

جسم ہر سانس کی آواز مقفل رکھتا

خاک ہی خاک کی خوشبو کا تدارک کرتی

جانتا تھا نہیں محفوظ ٹھکانہ میرا

لوگ موجود ہیں جو مجھ پہ نظر رکھتے ہیں

دور نزدیک نہاں خانوں کے اندر بیٹھے

ایک حرکت ہو تو سو عکس بنا لیتے ہیں

ان کی آنکھوں میں کھٹکتا ہے زر و مال مرا

طرز تعمیر مری منبر و محراب مرے

ان کے اہداف ہیں دیوار و در و باب مرے

اور اک گوہر نایاب کہ تہہ خانے میں

ہوس دل کو ہے اسباب پریشانی کا

میری دیوانگی و وحشت و حیرانی پر

مجھ پہ مامور کہن سال سگان خفتہ

کل کسی ساعت کمزور کی تاریکی میں

اس کمیں گاہ میں سوراخ سے در آئے تھے

دور دالان کے کونے میں کھڑے ہنستے ہیں

kis ne khinchi hain lakiren mire darwaze par

kaun hai jo ke dabe paon chala aya hai

mere be rang haiwle ka taaqub karta

main to mohtat tha aisa kahin ate jate

apne sae ko bhi patal mein chhor ata tha

apna saman uthata to shab-e-nisf pahar

dast-e-hushyar mitata mire qadmon ka suragh

jism har sans ki awaz muqaffal rakhta

khak hi khak ki khushbu ka tadaruk karti

janta tha nahin mahfuz thikana mera

log maujud hain jo mujh pe nazar rakhte hain

dur nazdik nihan khanon ke andar baithe

ek harkat ho to so aks bana lete hain

un ki ankhon mein khatakta hai zar-o-mal mira

tarz-e-taamir miri mimbar-o-mehrab mire

un ke ahdaf hain diwar-o-dar-o-bab mire

aur ik gauhar-e-nayab ke tah khane mein

hawas-e-dil ko hai asbab pareshani ka

meri diwangi-o-wahshat-o-hairani par

mujh pe mamur-e-kuhan sal sagin-e-khufta

kal kisi saat-e-kamzor ki tariki mein

is kamin gah mein surakh se dar ae the

dur dalan ke kone mein khare hanste hain