ہمارے غم جدا تھے

ہمارے غم جدا تھے

قریۂ دل کی فضا آب و ہوا

موسم جدا تھے

شام تیرے جسم کی دیوار سے چمٹی ہوئی تھی

مجھ کو کالی رات کھاتی تھی

تجھے آواز دیتی تھی ترے اندر سے اٹھتی ہوک

مجھ کو بھوک میری روح سے باہر بلاتی تھی

تجھے پاؤں میں پڑتی بیڑیوں کا روگ لاحق تھا

مجھے آزادی پہ شک تھا

تجھے اپنوں نے اپنے گھیر کا قیدی بنایا تھا

مجھے بے رشتگی نے ذات کا بھیدی بنایا تھا

مسلسل لیکھ پر گردش میں رہنا ناچنا

تیرا وطیرہ تھا

مری اک اپنی دنیا تھی

مرا اپنا جزیرہ تھا

کوئی دریا تھا اپنے بیچ

ہم دونوں کنارے تھے

الگ دو کہکشائیں تھیں

جہاں کے ہم ستارے تھے

hamare gham juda the

qarya-e-dil ki faza ab-o-hawa

mausam juda the

sham tere jism ki diwar se chimti hui thi

mujh ko kali rat khati thi

tujhe awaz deti thi tire andar se uthti huk

mujh ko bhuk meri ruh se bahar bulati thi

tujhe paon mein parti beriyon ka rog lahaq tha

mujhe azadi pe shak tha

tujhe apnon ne apne gher ka qaidi banaya tha

mujhe be rishtagi ne zat ka bhedi banaya tha

musalsal lekh par gardish mein rahna nachna

tera watera tha

miri ik apni duniya thi

mira apna jazira tha

koi dariya tha apne bich

ham donon kinare the

alag do kekushaen thin

jahan ke ham sitare the