پھر موسم یخ بستہ بدلنے کی خبر دے
Kahkashan Tabassum (b. 1960)پھر موسم یخ بستہ بدلنے کی خبر دے
رگ رگ میں جمی برف پگھلنے کی خبر دے
یا دل کے چراغوں کو لہو اور عطا کر
یا راہ میں پھر چاند نکلنے کی خبر دے
یا موسم خوش رنگ کوئی بھیج زمیں پر
یا گردش افلاک بدلنے کی خبر دے
بس اڑتے بگولے ہیں سرابوں کے سفر میں
ایڑی کوئی چشمے کے ابلنے کی خبر دے
در بند کئے لوگ گھروں میں ہیں مقید
آسیب زدہ رات کے ڈھلنے کی خبر دے
بھیگی ہوئی لکڑی ہوں دھواں دیتی ہوں پہروں
اب مجھ کو مری آگ میں جلنے کی خبر دے
اخبار بھی دہشت کا تراشا ہے تبسمؔ
ہر صبح فقط دل کے دہلنے کی خبر دے
phir mausam yakh basta badalne ki khabar de
rag rag mein jami barf pighalne ki khabar de
ya dil ke charaghon ko lahu aur ata kar
ya rah mein phir chand nikalne ki khabar de
ya mausam khush rang koi bhej zamin par
ya gardish-e-aflak badalne ki khabar de
bas urte bagule hain sarabon ke safar mein
eri koi chashme ke ubalne ki khabar de
dar band kiye log gharon mein hain muqayyad
aseb zada rat ke dhalne ki khabar de
bhigi hui lakri hun dhuan deti hun pahron
ab mujh ko miri ag mein jalne ki khabar de
akhbar bhi dahshat ka tarasha hai tabassum
har subh faqat dil ke dahalne ki khabar de