رہ گیا راہ میں جب کچھ بھی نہ کانٹوں کے سوا

رہ گیا راہ میں جب کچھ بھی نہ کانٹوں کے سوا

تیرگی جھوٹ کی جب چھا گئی سچائی پر

افق زندہ و پائندۂ ننکانہ سے

ہنس پڑی ایک کرن وقت کی تنہائی پر

دل کے سنسان کھنڈر میں کوئی نغمہ جاگا

آنکھ ملتی ہوئی اک صبح بیاباں سے اٹھی

فکر آزاد ہوئی ذہن کے جالے ٹوٹے

اور ایقان کی لو سینۂ انساں سے اٹھی

زہر میں ڈوب گئی تھیں جو زبانیں یکسر

ان پہ شیرینیٔ وحدت کے ترانے آئے

جسم مرتا ہے مگر روح کہاں مرتی ہے

روح اک نور ہے اور جسم تھرکتے سائے

جسم کانٹوں سے گزرتا ہے گزر جانے دو

روح وہ پھول ہے جس پر نہ خزاں آئے گی

روح پی لے گی جو عرفان و محبت کی شراب

مستی و کیف ہمیشہ کے لیے پائے گی

پیر ننگانہ تری روح صداقت کو سلام

جاوداں پرچم الفت ترا لہراتا ہے

rah gaya rah mein jab kuchh bhi na kanton ke siwa

tirgi jhut ki jab chha gai sachchai par

ufuq zinda-o-painda-e-nankana se

hans pari ek kiran waqt ki tanhai par

dil ke sunsan khandar mein koi naghma jaga

ankh milti hui ik subh bayaban se uthi

fikr-e-azad hui zehn ke jale tute

aur iqan ki lau sina-e-insan se uthi

zahr mein dub gai thin jo zabanen yaksar

un pe shirini-e-wahdat ke tarane ae

jism marta hai magar ruh kahan marti hai

ruh ik nur hai aur jism thirakte sae

jism kanton se guzarta hai guzar jane do

ruh wo phul hai jis par na khizan aegi

ruh pi legi jo irfan-o-mohabbat ki sharab

masti-o-kaif hamesha ke liye paegi

pir nangana tiri ruh sadaqat ko salam

jawedan parcham-e-ulfat tira lahrata hai