خامشی گر تمہیں مرغوب ہے تنہا ہی رہو

خامشی گر تمہیں مرغوب ہے تنہا ہی رہو

زندگی شور سے منسوب ہے تنہا ہی رہو

ٹوٹے آئینے ہیں اور عکس بھی ہیں مسخ شدہ

یہ صداقت کسے مطلوب ہے تنہا ہی رہو

اب تو ہر سمت تماشے ہیں وما ادراک

بے اثر صحبت مجذوب ہے تنہا ہی رہو

تم جسے شافع حاجات سمجھتے ہو یہاں

وہ کسی اور کا مندوب ہے تنہا ہی رہو

ظلمت عقل ہدایت سے منور نہ ہوئی

کیسے دیکھو گے جو محجوب ہے تنہا ہی رہو

khamushi gar tumhen marghub hai tanha hi raho

zindagi shor se mansub hai tanha hi raho

tute aine hain aur aks bhi hain maskh shuda

ye sadaqat kise matlub hai tanha hi raho

ab to har samt tamashe hain wama idrak

be asar sohbat-e-majzub hai tanha hi raho

tum jise shafe-e-hajat samajhte ho yahan

wo kisi aur ka mandub hai tanha hi raho

zulmat-e-aql hidayat se munawwar na hui

kaise dekhoge jo mahjub hai tanha hi raho