سخن فریب کوئی مہرباں کی طرح

سخن فریب کوئی مہرباں کی طرح

دیار حسن ہے دنیا کی داستاں کی طرح

یہ مسکراتی ہوئی صبح و شام و شب کی دلہن

دل و نظر کے لیے سود بے زیاں کی طرح

یہ امتزاج زر شرق و غرب کا کلچر

نگاہ حسن لیے عشق عاشقاں کی طرح

حریر و ریشم و دیبا میں رنگ ناز و ادا

سکون دل کے لیے ہیں قرار جاں کی طرح

یہ رنگ رنگ کے عنواں لیے حسیں چہرے

صنم کدوں میں تخیل کے ہیں بتاں کی طرح

سڈول جسم کہ سرد رواں سر راہے

چلے ہیں ناز سے حوران آسماں کی طرح

یہ لہکی مہکی فضائیں یہ دل ربا پیکر

گلوں کے رنگ میں ڈوبے ہوئے جہاں کی طرح

یہ ربط و رقص و ترنم ہوا کی لہروں میں

قدم قدم پہ ادا ہائے مہوشاں کی طرح

یہ جگمگاتی ہوئی رات یہ دہکتے کنول

نجوم و ماہ و ثریا و کہکشاں کی طرح

یہ میرے خوابوں خیالوں کی اپسرا جس میں

نگاہ فکر و عمل تیر کی کماں کی طرح

مگر وطن بھی چھٹا دورؔ دل کی دل میں رہی

یہ بمبئی بھی نہ ہو خواب دیگراں کی طرح

sukhan fareb koi mehrban ki tarah

dayar-e-husn hai duniya ki dastan ki tarah

ye muskurati hui subh-o-sham-o-shab ki dulhan

dil-o-nazar ke liye sud be ziyan ki tarah

ye imtizaj-e-zar sharq-o-gharb ka kalchar

nigah-e-husn liye ishq ashiqan ki tarah

harir-o-resham-o-diba mein rang-e-naz-o-ada

sukun-e-dil ke liye hain qarar-e-jan ki tarah

ye rang rang ke unwan liye hasin chehre

sanam kadon mein takhayyul ke hain butan ki tarah

sidaul jism ke sard rawan sar-e-rahe

chale hain naz se huran asman ki tarah

ye lahki mahki fazaen ye dil ruba paikar

gulon ke rang mein dube hue jahan ki tarah

ye rabt-o-raqs-o-tarannum hawa ki lahron mein

qadam qadam pe ada hae mahwashan ki tarah

ye jagmagati hui rat ye dahakte kanwal

nujum-o-mah-o-surayya-o-kahkashan ki tarah

ye mere khwabon khayalon ki apsra jis mein

nigah-e-fikr-o-amal tir ki kaman ki tarah

magar watan bhi chhuta dur dil ki dil mein rahi

ye bambai bhi na ho khwab digaran ki tarah