مرا کمرے سے بس نیندوں کا رشتہ تھا

مرا کمرے سے بس نیندوں کا رشتہ تھا

اور اس زینے سے خوابوں کا

جو لہراتا ہوا جاتا تھا چھت تک

وہ چھت

جہاں سے آسماں نزدیک تھا

جہاں آرام فرماتی تھیں آنکھیں

وو آنکھیں جن میں سپنے تھے

وہ سپنے جن میں دنیا تھی

وہ دنیا جس میں سب کچھ تھا

وہی چھت

جہاں پر ایک چڑیا کی سریلی چہچہاہٹ تھی

پتنگوں کی سجاوٹ تھی

فلک کی جھلملاہٹ تھی

مگر افسوس

وہ چڑیا جو سویرے گھر میں سب سے پہلے اٹھتی تھی

کسے معلوم تھا اک دن وہ زیر دام آئے گی

پتنگ کاغذی جو آسماں چھونے ہی والی تھی

کسے معلوم تھا وہ لوٹ کر ناکام آئے گی

فلک جس پر تمناؤں کے کتنے چاند روشن تھے

کسے معلوم تھا اس پر اماوس کی بھی کوئی شام آئے گی

وہ چھت جو گھر کا سب سے پر سکوں اور پیارا حصہ تھی

کسے معلوم تھا وہ خودکشی کے کام آئے گی

mira kamre se bas nindon ka rishta tha

aur is zine se khwabon ka

jo lahrata hua jata tha chhat tak

wo chhat

jahan se asman nazdik tha

jahan aram farmati thin ankhen

wo ankhen jin mein sapne the

wo sapne jin mein duniya thi

wo duniya jis mein sab kuchh tha

wahi chhat

jahan par ek chiriya ki surili chahchahahat thi

patangon ki sajawat thi

falak ki jhilmilahat thi

magar afsos

wo chiriya jo sawere ghar mein sab se pahle uthti thi

kise maalum tha ik din wo zer-e-dam aegi

patang-e-kaghzi jo asman chhune hi wali thi

kise maalum tha wo laut kar nakam aegi

falak jis par tamannaon ke kitne chand raushan the

kise maalum tha us par amawas ki bhi koi sham aegi

wo chhat jo ghar ka sab se pur sakun aur pyara hissa thi

kise maalum tha wo khudkushi ke kam aegi