کھوکھلے سینوں میں بہتا ہے مسیحائی عذاب

کھوکھلے سینوں میں بہتا ہے مسیحائی عذاب

خیر و شر کے مسئلے سب آج بھی ہم دوش ہیں

رقص موسیقی ادب احساس اور فکر و بیاں

کرب میں ڈوبے ہوئے خاکستر خاموش ہیں

تشنگی منہ کھول کر لیٹی ہے جلتے فرش پر

آسماں روئے تو تر ہو آرزؤں کا لباس

خواہشوں کی میٹھی میٹھی آنچ کی لذت میں گم

آدمی بس گھومتا ہے خواہشوں کے آس پاس

لوگ ننگے جسم بے چہرہ درختوں کی طرح

ڈھونڈتے ہیں اپنے باطن میں ہوس کی تازگی

چند تیرہ ساعتوں کی جادوئی لو کے طفیل

ہم وجودوں کی دراڑوں میں پھنسے ہیں آج بھی

ہاتھ میں خنجر نگاہوں میں لیے کچھ مسئلے

ہر بشر پر خندہ زن یہ کوئی ڈائن ہے کہ رات

اپنے آنچل میں سمیٹے کل جہاں کی ظلمتیں

محو غفلت بھیلنی کا تلخ جوبن ہے کہ رات

پتھروں پر جسم رگڑو قوتیں یکجا کرو

خود کو سلگاؤ کہ ساری رات یہ مشعل جلے

آگ ہی تو شان لب ہے آگ اگلتے جاؤ تم

خواہ شہر دل جلے یا جسم کا جنگل جلے

khokhle sinon mein bahta hai masihai azab

khair-o-shar ke masale sab aj bhi ham dosh hain

raqs-e-mausiqi adab ehsas aur fikr-o-bayan

karb mein dube hue khakistar-e-khamosh hain

tishnagi munh khol kar leti hai jalte farsh par

asman roe to tar ho arzuon ka libas

khwahishon ki mithi mithi anch ki lazzat mein gum

admi bas ghumta hai khwahishon ke as pas

log nange jism-e-be chehra darakhton ki tarah

dhundte hain apne batin mein hawas ki tazgi

chand tira saaton ki jadui lo ke tufail

ham wajudon ki dararon mein phanse hain aj bhi

hath mein khanjar nigahon mein liye kuchh masale

har bashar par khanda zan ye koi dain hai ke rat

apne anchal mein samete kal jahan ki zulmaten

mahw-e-ghaflat bhilani ka talkh joban hai ke rat

pattharon par jism ragaro quwwaten yakja karo

khud ko silgao ke sari rat ye mashal jale

ag hi to shan lab hai ag ugalte jao tum

khwah shahr-e-dil jale ya jism ka jangal jale