آوارہ گرد لمحے یوں بے قرار بھٹکیں

آوارہ گرد لمحے یوں بے قرار بھٹکیں

جیسے پرند پیاسے دیوانہ وار بھٹکیں

بے جان و بے تکلم اک آرزو ہے تنہا

جنگل میں جیسے کوئی ویران سی عمارت

بستی سے دور جیسے خاموشیوں کا پربت

تانے کھڑا ہو خود کو جامد صدی کی صورت

احساس اپنی لو پر یوں تمتمائے جیسے

شعلوں پہ چل رہا ہو اک بے لباس جوگی

کہتی ہے عقل ہم کو جلوت پسند روگی

کیا سادھوؤں میں ایسی جوالا جگی نہ ہوگی

اکثر سمیٹتے ہیں بکھرے ہوئے جنوں کو

ہم لوگ آج بھی ہیں کس درجہ نا مکمل

شیطاں صفت شرارے اوڑھے دھویں کے کمبل

دوشیزگی غم کو جھل سائیں جب مسلسل

چنگھاڑتی ہیں سانسیں سینوں میں بے تحاشا

جیسے عظیم انساں پامال ہو گیا ہو

جیسے ہر ایک لٹ کر کنگال ہو گیا ہو

اک مختصر سا پل بھی صد سال ہو گیا ہو

اجگر گپھا میں لیٹا شیرینیاں چبائے

اور ہم یہ سوکھے پتے اب تک بٹورتے ہیں

awara gard lamhe yun be qarar bhatken

jaise parind pyase diwana war bhatken

be jan-o-be takallum ik arzu hai tanha

jangal mein jaise koi wiran si imarat

basti se dur jaise khamoshiyon ka parbat

tane khara ho khud ko jamid sadi ki surat

ehsas apni lo par yun tamtamae jaise

sholon pe chal raha ho ik be libas jogi

kahti hai aql ham ko jalwat pasand rogi

kya sadhuon mein aisi jwala juggi na hogi

aksar samette hain bikhre hue junun ko

ham log aj bhi hain kis darja na mukammal

shaitan sifat sharare orhe dhuen ke kambal

doshizagi-e-gham ko jhal saen jab musalsal

chingharti hain sansen sinon mein be tahasha

jaise azim insan pamal ho gaya ho

jaise har ek lut kar kangal ho gaya ho

ik mukhtasar sa pal bhi sad sal ho gaya ho

ajgar gupha mein leta shiriniyan chabae

aur ham ye sukhe patte ab tak batorte hain