بستی کی بیمار گلی میں

بستی کی بیمار گلی میں

شہنائی جب جب گونجی ہے

ماں نے اکثر مجھ سے کہا ہے

تم بھی اپنا بیاہ رچا لو

میں گھر کے کونے میں بیٹھا

شور سن رہا ہوں شہروں کا

گھائل ندیوں کی لہروں کا

پربت پر بیٹھا اک جوگی

اپنی آنکھیں بند کیے مجھ پر ہنستا ہے

اور وہ مستقبل کی عورت

کبھی سراسر زہر اگلتی

کبھی انوکھا زہر نگلتی

پیٹ رہی ہے چاٹ رہی ہے چھاتی میری

دریا جنگل پربت صحرا

شور ہے کتنا اندر باہر

پل پل جیسے کوڑے لگا رہی ہے خواہش

صدیوں کے پیاسے نیزے پیوست ہوئے پھر

سوکھی اور بے رنگ رگوں میں

خون کے اک قطرے کی خاطر

صدیوں کی راہیں طے کرنا

کوئی مشکل کام نہیں ہے

بحر کشاکش کے ساحل پر

راحت پتھر توڑ رہی ہے

موج تمنا چٹانوں سے اپنا ماتھا پھوڑ رہی ہے

میں گھر کے کونے میں بیٹھا

شور سن رہا ہوں ممتا کا

ہاں اب میں سوچ رہا ہوں

ایسا کوئی راس رچاؤں

اماں کی بوڑھی چھاتی پر

ایک نیا صدمہ بن جاؤں

basti ki bimar gali mein

shahnai jab jab gunji hai

man ne aksar mujh se kaha hai

tum bhi apna biyah racha lo

main ghar ke kone mein baitha

shor sun raha hun shahron ka

ghayal nadiyon ki lahron ka

parbat par baitha ik jogi

apni ankhen band kiye mujh par hansta hai

aur wo mustaqbil ki aurat

kabhi sarasar zahr ugalti

kabhi anokha zahr nigalti

pet rahi hai chat rahi hai chhati meri

dariya jangal parbat sahra

shor hai kitna andar bahar

pal pal jaise kore laga rahi hai khwahish

sadiyon ke pyase neze paiwast hue phir

sukhi aur be rang ragon mein

khun ke ik qatre ki khatir

sadiyon ki rahen tai karna

koi mushkil kam nahin hai

bahr kashakash ke sahil par

rahat patthar tor rahi hai

mauj-e-tamanna chatanon se apna matha phor rahi hai

main ghar ke kone mein baitha

shor sun raha hun mamta ka

han ab main soch raha hun

aisa koi ras rachaun

aman ki burhi chhati par

ek naya sadma ban jaun