قریب صبح صدائے شکست جاں ابھری

قریب صبح صدائے شکست جاں ابھری

لبوں کا زہر اچانک پگھل گیا آخر

سکوت جسم لہو پیتے پیتے چونک اٹھا

یہ کون شب کی تمازت سے جل گیا آخر

کراہتا سا اٹھا کوئی ٹوٹتا پیکر

سیاہیوں میں سلگتا ہوا دھواں جیسے

جھٹک کے دور ہوئی بستروں سے اکتاہٹ

لپٹ گیا ہو کوئی سانپ ناگہاں جیسے

عذاب روح مکانوں کا درد چاٹے گا

بڑھیں گے شہر تمنا کی سمت سب سائے

کشاکشوں کے سمندر میں ڈبکیاں لیتے

ہر ایک ذات کی موجودیت سے اکتائے

گھروں میں قید در و بام کی ہر اک الجھن

گلی گلی کے لبوں سے لپٹ رہی ہوگی

طبیعتوں کو سنبھالے ہوئے دھوئیں کی لکیر

ورق کتاب نفس کے الٹ رہی ہوگی

رہے گا یوں ہی سروں پر عتاب کا سورج

اسی طرح سے بسر ہوتے جائیں گے دن رات

کلیجہ منہ میں رکھے اور سینے پر پتھر

گزار دیں گے گزرتے ہوئے سبھی صدمات

qarib-e-subh sada-e-shikast-e-jan ubhri

labon ka zahr achanak pighal gaya akhir

sukut-e-jism lahu pite pite chaunk utha

ye kaun shab ki tamazat se jal gaya akhir

karahatta sa utha koi tutta paikar

siyahiyon mein sulagta hua dhuan jaise

jhatak ke daur hui bistaron se uktahat

lipat gaya ho koi sanp nagahan jaise

azab ruh makanon ka dard chatega

barhenge shahr-e-tamanna ki samt sab sae

kashakashon ke samundar mein dubkiyan lete

har ek zat ki maujudiyyat se uktae

gharon mein qaid dar-o-bam ki har ik uljhan

gali gali ke labon se lipat rahi hogi

tabiaton ko sambhale hue dhuen ki lakir

waraq kitab-e-nafas ke ulat rahi hogi

rahega yun hi saron par itab ka suraj

isi tarah se basar hote jaenge din rat

kaleja munh mein rakhe aur sine par patthar

guzar denge guzarte hue sabhi sadmat