پھیل کر پھر شب تاریک ہوئی بحر سیاہ

پھیل کر پھر شب تاریک ہوئی بحر سیاہ

قطرہ قطرہ لب تنہائی سے ٹپکے احساس

اور پلکوں کی صلیبوں پہ وہ گزرے ہوئے دن

جیسے کھنڈروں کی فصیلوں پہ ٹنگا ہو اتہاس

دفن ہے راکھ کے انبار تلے عزم کی لاش

جستجو اس کی کرے آج کسے فرصت ہے

روشنی مانگ نہ سورج سے نہ ستاروں سے

تیرہ و تار مکانوں میں بڑی راحت ہے

اب تو الفاظ کے چہروں کی خراشیں پڑھ کر

وقت کو ٹال دیا جائے گداگر کی طرح

ورنہ وہ لمس جو شبنم سے سبک تر تھا کبھی

آج پھر سینے پہ گر جائے گا پتھر کی طرح

phail kar phir shab-e-tarik hui bahr-e-siyah

qatra qatra lab-e-tanhai se tapke ehsas

aur palkon ki salibon pe wo guzre hue din

jaise khandaron ki fasilon pe tanga ho ithas

dafn hai rakh ke ambar tale azm ki lash

justuju us ki kare aj kise fursat hai

raushni mang na suraj se na sitaron se

tira-o-tar makanon mein bari rahat hai

ab to alfaz ke chehron ki kharashen parh kar

waqt ko tal diya jae gadagar ki tarah

warna wo lams jo shabnam se subuk tar tha kabhi

aj phir sine pe gir jaega patthar ki tarah