غبارے ستارے

غبارے ستارے

گلابی شرابی کھلے پرچموں کے شرارے اڑاتے

ہزاروں کی تعداد میں وہ گھروں سے اسکولوں سے آئے

دہکتے ہوئے گال اڑتے ہوئے بال

جسموں کے موتی

وہ شبنم تھے لیکن

بدلتے گئے گرم لاوے میں پیہم

وہ بہتے گئے موج در موج ہر رہ گزر پر

فلک بوس نعروں سے اپنے وطن کے نئے یا پرانے

چلے وہ بڑھے وہ

سبھی مشتہر دشمنوں کو مٹانے

مگر شوخ چہروں کے اس کارواں میں

تصور میں بنتے سنورتے ہوئے سورماؤں سے ہٹ کر

خدا جانے کیسے کہاں سے وہ آیا

وہ ننھا سا معصوم بالک

جو خاموش حیراں پریشاں

غباروں شراروں فلک بوس نعروں

کے بے رحم دریا میں بہتا لڑھکتا چلا جا رہا تھا

اسے کون پہچانتا جب تماشائیوں کی صفوں میں

اسے دیکھنے والا کوئی نہیں تھا

ghubare sitare

gulabi sharabi khule parchamon ke sharare urate

hazaron ki taadad mein wo gharon se iskulon se ae

dahakte hue gal urte hue bal

jismon ke moti

wo shabnam the lekin

badalte gae garm lawe mein paiham

wo bahte gae mauj dar mauj har rah guzar par

falak bos naaron se apne watan ke nae ya purane

chale wo barhe wo

sabhi mushtahar dushmanon ko mitane

magar shokh chehron ke is karwan mein

tasawwur mein bante sanwarte hue surmaon se hat kar

khuda jane kaise kahan se wo aya

wo nanha sa maasum balak

jo khamosh hairan pareshan

ghubaron shararon falak bos naaron

ke be rahm dariya mein bahta lurhakta chala ja raha tha

use kaun pahchanta jab tamashaiyon ki safon mein

use dekhne wala koi nahin tha