مکاں جل چکا ہے

مکاں جل چکا ہے

کھنڈر ہے سیاہی ہے بجھتی ہوئی راکھ کی سسکیاں ہیں

مری آنکھ پر نم ہے

چپ چاپ گم سم کھڑا ہوں یہاں پر

مرے آنسوؤں میں

تصاویر ہیں

ماضی و حال کی

وقت کی منزلوں کی

مرے ذہن میں داستاں ہے

زمانے کے بننے بگڑنے کی

تعمیر و تخریب کی دھڑکنوں کی

مرے کان میں گونجتی ہیں وہ نرم اور شیریں صدائیں

جنہیں آگ نے اس مکان کے کھنڈر میں فنا کر دیا ہے

محبت کی تقدیس

معصوم شمعوں کے اشکوں کی گرمی

دھوئیں کی تڑپتی ہوئی دھاریاں

ان کا پیغام بن کر

فضاؤں میں شاید بھٹکنے لگی ہیں

مری آنکھ پر نم ہے پھر بھی میں خوش ہوں

مرے پاس خوابوں کی معصوم ٹھنڈک

ارادوں کے روشن ستاروں کی نرمی

تخیل کی بہتی ہوئی نغمگی ہے

میں یادوں کے ملبے پہ تخلیق کا پھول لے کر کھڑا ہوں

makan jal chuka hai

khandar hai siyahi hai bujhti hui rakh ki siskiyan hain

miri ankh pur nam hai

chup chap gum sam khara hun yahan par

mire ansuon mein

tasawir hain

mazi-o-hal ki

waqt ki manzilon ki

mire zehn mein dastan hai

zamane ke banne bigarne ki

taamir-o-takhrib ki dharkanon ki

mire kan mein gunjti hain wo narm aur shirin sadaen

jinhen ag ne is makan ke khandar mein fana kar diya hai

mohabbat ki taqdis

maasum shamon ke ashkon ki garmi

dhuen ki tarapti hui dhariyan

un ka paigham ban kar

fazaon mein shayad bhatakne lagi hain

miri ankh pur nam hai phir bhi main khush hun

mire pas khwabon ki maasum thandak

iradon ke raushan sitaron ki narmi

takhayyul ki bahti hui naghmagi hai

main yadon ke malbe pe takhliq ka phul le kar khara hun