سر سبزی مستی شادابی جھونکوں کا مدھم سنگیت

سر سبزی مستی شادابی جھونکوں کا مدھم سنگیت

ہرے بھرے کھیتوں میں ننھے منے پودوں کی سرسر

مٹی کے زرخیز بدن کی سوندھی سوندھی سی خوشبو

رو پہلی چمکیلی دھوپ کی پیاری پیاری سی لذت

پیڑوں کے ٹھنڈے سایوں میں شفقت کی ہلکی سی آنچ

پگڈنڈی کے موڑ پہ لہراتے آنچل کی رنگینی

جسموں میں قوت کی موجیں آنکھوں میں بھرپور چمک

ہنستے کھیلتے ننھے بچے انگ انگ میں طراری

زرخیز و شاداب زمیں پر ہستی یوں لہراتی ہے

جیسے اک معصوم سی بچی گڑیا لے کر ناچ اٹھے

سینے باہیں زلفیں ہونٹ جواں جسموں کی لہراہٹ

رقص و نغمہ جام و مینا ساقی کی آنکھوں کی تھکن

محل و ایواں گرمیٔ لذت خوابوں کا مسرور جہاں

مسجد کے اونچے مینارے مندر کا سونے کا کلس

شور و غوغا ہنگامے افسانے جیسے مرنے کے

محکومی کلفت شورش زخموں کی بوچھاریں ہر سو

جنگ قحط بیماری حسرت جینے والوں کی دولت

رنگ رنگ کے پرچم ظلم و تشدد کے سارے ساماں

جینے والوں کی دنیا ہر لمحہ رنگ بدلتی ہے

خستہ امکانات کی کڑیاں ٹوٹ کے گرتی ہیں

آبادی اور ویرانہ مفہوم بدلتے رہتے ہیں

دکھتی روتی دھرتی پر ہستی شور مچاتی ہے

جیسے اک ننھی بچی شفقت کی بھوکی چیخ اٹھے

آج مگر سینے میں یہ احساس دھڑکتا ہے پیہم

میں اس دور کا انساں ہوں جس میں سارے انسانوں نے

اپنے جیتے جاگتے عزم امن و سکوں کی قوت سے

ایک نئے امکان کی شمع روشن کی ہے دھرتی پر

ایک نئی منزل کی جانب اپنے قدم بڑھائے ہیں

قوت محنت اور مسرت کے رستے اپنائے ہیں

احساسات کی تصویریں یہ سائے دوڑتے لمحوں کے

دھرتی کی تخلیق ہیں اس کی گود میں پھلتے پھولتے ہیں

sar sabzi masti shadabi jhonkon ka maddham sangit

hare bhare kheton mein nanhe mane paudon ki sarsar

mitti ke zarkhez badan ki sondhi sondhi si khushbu

ro pahli chamkili dhup ki pyari pyari si lazzat

peron ke thande sayon mein shafqat ki halki si anch

paggdandi ke mor pe lahrate anchal ki rangini

jismon mein quwwat ki maujen ankhon mein bharpur chamak

hanste khelte nanhe bachche ang ang mein tarrari

zarkhez-o-shadab zamin par hasti yun lahrati hai

jaise ik maasum si bachi guriya le kar nach uthe

sine bahen zulfen hont jawan jismon ki lahrahat

raqs-o-naghma jam-o-mina saqi ki ankhon ki thakan

mahal-o-aiwan garmi-e-lazzat khwabon ka masrur jahan

masjid ke unche menare mandir ka sone ka kalas

shor-o-ghaugha hangame afsane jaise marne ke

mahkumi kulfat shorish zakhmon ki bauchharen har su

jang qaht bimari hasrat jine walon ki daulat

rang rang ke parcham zulm-o-tashaddud ke sare saman

jine walon ki duniya har lamha rang badalti hai

khasta imkanat ki kariyan tut ke girti hain

abadi aur wirana mafhum badalte rahte hain

dikhti roti dharti par hasti shor machati hai

jaise ik nanhi bachi shafqat ki bhuki chikh uthe

aj magar sine mein ye ehsas dharakta hai paiham

main is daur ka insan hun jis mein sare insanon ne

apne jite jagte azm-e-amn-o-sukun ki quwwat se

ek nae imkan ki sham-e-raushan ki hai dharti par

ek nai manzil ki janib apne qadam barhae hain

quwwat mehnat aur masarrat ke raste apnae hain

ehsasat ki taswiren ye sae daurte lamhon ke

dharti ki takhliq hain us ki god mein phalte phulte hain