شہسوار

شہسوار

ننھا منا شہسوار

ایستادہ ہے

خمیدہ پشت پر میری

جوں ہی جھکتا ہوں

وہ ترغیب دیتا ہے

مجھے چلنے کی

آوازوں کی سرگم سے

میں چلتا ہوں

میں واماندہ قدم چلتا ہوں

وہ مہمیز کی جنبش سے کہتا ہے کہ دوڑو

اور دوڑو، تیز تر، سرپٹ چلو

باد نغمہ کار سے باتیں کرو

اس کا میں رخش رضا

تیز تر کرتا ہوں رفتار خرام

مجھ کو پہنچانا ہے آج

اس کو رنگوں تتلیوں کے دیس میں

جادو نگر میں

میرے سائے کا بھی اب شاید جہاں

منتظر کوئی نہیں

منتظر ہیں اس کے لیکن، میرے ننھے دوست کے

دیو قامت سبز وارفتہ وقار

دور تک سرگوشیاں کرتے ہوئے اشجار

رقص برگ و بار

جا رہا ہے خواب کی رفتار سے

میرا ننھا شہسوار

shahsawar

nanha mana shahsawar

istada hai

khamida pusht par meri

jun hi jhukta hun

wo targhib deta hai

mujhe chalne ki

awazon ki sargam se

main chalta hun

main wamanda qadam chalta hun

wo mohmiz ki jumbish se kahta hai ke dauro

aur dauro, tez tar, sarpat chalo

bad naghma kar se baten karo

us ka main rakhsh-e-raza

tez tar karta hun raftar khiram

mujh ko pahunchana hai aj

us ko rangun titliyon ke des mein

jadu nagar mein

mere sae ka bhi ab shayad jahan

muntazir koi nahin

muntazir hain us ke lekin, mere nanhe dost ke

dew qamat sabz warafta waqar

dur tak sargoshiyan karte hue ashjar

raqs barg-o-bar

ja raha hai khwab ki raftar se

mera nanha shahsawar