وہ موج اک مقام سے

وہ موج اک مقام سے

افق کی سمت

پھیلتی چلی گئی

وہ ایک دائرے سے

سیکڑوں حسین دائروں میں

دیکھتے ہی دیکھتے بدل گئی

ہر ایک دائرے میں آفتاب تھا

ہر ایک دائرے میں سرخ زہر تھا

ہر ایک دائرہ حیات‌‌ جاوداں

ہر ایک دائرے میں مرگ شادماں

وہ ایک تھی

ہزار صورتوں میں میرے سامنے

طلوع جب ہوئی

تو میرا آسمان بن گئی

نئی عظیم لذتوں کے درمیاں

میں اپنے مشتعل مقام سے

افق کی سمت پھیلتا چلا گیا

حصار مرگ زندگی کو روندتا چلا گیا

wo mauj ik maqam se

ufuq ki samt

phailti chali gai

wo ek daire se

saikron hasin dairon mein

dekhte hi dekhte badal gai

har ek daire mein aftab tha

har ek daire mein surkh zahr tha

har ek daira hayat-e-jawedan

har ek daire mein marg shadman

wo ek thi

hazar suraton mein mere samne

tulu jab hui

tu mera asman ban gai

nai azim lazzaton ke darmiyan

main apne mushtail maqam se

ufuq ki samt phailta chala gaya

hisar-e-marg zindagi ko rondata chala gaya