گو رات کی جبیں سے سیاہی نہ دھل سکی

گو رات کی جبیں سے سیاہی نہ دھل سکی

لیکن مرا چراغ برابر جلا کیا

جس سے دلوں میں اب بھی حرارت کی ہے نمود

برسوں مری لحد سے وہ شعلہ اٹھا کیا

پھیکا ہے جس کے سامنے عکس جمال یار

عزم جواں کو میں نے وہ غازہ عطا کیا

میرے لہو کی بوند میں غلطاں تھیں بجلیاں

خاک دکن کو میں نے شرر آشنا کیا

ساحل کی آنکھ میں مگر آئی نہ کچھ کمی

دریا میں لاکھ لاکھ تلاطم ہوا کیا

خواب گراں سے غنچوں کی آنکھیں نہ کھل سکیں

گو شاخ گل سے نغمہ برابر اٹھا کیا

یہ بزم ایسی سوئی کہ جاگی نہ آج تک

فطرت کا کارواں ہے کہ آگے بڑھا کیا

مارا ہوا ہوں گو خلش انتظار کا

مشتاق آج بھی ہوں پیام بہار کا

go rat ki jabin se siyahi na dhul saki

lekin mira charagh barabar jala kiya

jis se dilon mein ab bhi hararat ki hai numud

barson miri lahad se wo shola utha kiya

phika hai jis ke samne aks-e-jamal-e-yar

azm-e-jawan ko main ne wo ghaza ata kiya

mere lahu ki bund mein ghaltan thin bijliyan

khak dakan ko main ne sharar ashna kya

sahil ki ankh mein magar ai na kuchh kami

dariya mein lakh lakh talatum hua kiya

khwab-e-giran se ghunchon ki ankhen na khul saken

go shakh-e-gul se naghma barabar utha kiya

ye bazm aisi soi ke jagi na aj tak

fitrat ka karwan hai ke age barha kiya

mara hua hun go khalish-e-intizar ka

mushtaq aj bhi hun payam-e-bahar ka